പ്ലാസ്റ്റിക് തിന്നുന്ന മനുഷ്യർ

അറിയാതെയാണെങ്കിലും മനുഷ്യരും പ്ലാസ്റ്റിക് തിന്നുന്നുണ്ട്. ഓരോ നിമിഷവും മനുഷ്യശരീരത്തിലേക്ക് പ്ലാസ്റ്റിക് കണികകൾ കടന്നുകൂടിക്കൊണ്ടിരിക്കുന്നു. ഇത് എത്രമാത്രം ഗുരുതരമായ ആരോഗ്യപ്രശ്നങ്ങൾ ഉണ്ടാക്കും എന്നത് ആശങ്കയോടെയാണ് വൈദ്യശാസ്ത്രം വീക്ഷിക്കുന്നത് 

- സി.സജിൽ

നിങ്ങൾ പ്ലാസ്റ്റിക് തിന്നാറുണ്ടോ? ഇതെന്ത് ചോദ്യമാണ്. ഇല്ല എന്നല്ലാതെ എന്ത് ഉത്തരമാണ് പറയേണ്ടത്. എന്നാൽ, കാര്യങ്ങൾ അങ്ങനെയല്ല. അറിയാതെയെങ്കിലും പ്ലാസ്റ്റിക് തിന്നുകയാണ് മനുഷ്യരും. ഓരോ നിമിഷവും മനുഷ്യശരീരത്തിലേക്ക് പ്ലാസ്റ്റിക് കണികകൾ കടന്നു കൂടിക്കൊണ്ടിരിക്കുന്നു. ഇത് എത്രമാത്രം ഗുരുതരമായ ആരോഗ്യപ്രശ്നങ്ങൾ ഉണ്ടാക്കും എന്ന കാര്യം ആശങ്കയോടെയാണ് വൈദ്യശാസ്ത്രം വീക്ഷിക്കുന്നത്.

പ്ലാസ്റ്റിക് വലിച്ചെറിയുമ്പോഴുള്ള പാരിസ്ഥിതിക പ്രശ്നങ്ങളെക്കുറിച്ചും പ്ലാസ്റ്റിക് കത്തിക്കുമ്പോഴുള്ള ആരോഗ്യപ്രശ്നങ്ങളെക്കുറിച്ചും അറിയാത്തവർ ഉണ്ടാവില്ല. എന്നാൽ, പ്ലാസ്റ്റിക്കിന്റെ അതിസൂക്ഷ്മ കണികകൾ മനുഷ്യശരീരത്തിലേക്ക് നിരന്തരം കടക്കുന്നു എന്നത് ഞെട്ടിക്കുന്ന കണ്ടെത്തലാണ്. ഭക്ഷണത്തിലൂടെയും വെള്ളത്തിലൂടെയും ശ്വസിക്കുന്ന വായുവിലൂടെയും അത് ശരീരത്തിലേക്ക് കടക്കുന്നു. രക്തത്തിൽ കലരുന്നു. രക്തത്തിലൂടെ ശരീരത്തിന്റെ മുക്കിലും മുലയിലും സഞ്ചരിക്കുന്നു. അതിനിടയിൽ ആന്തരിക അവയവങ്ങളിൽ അടിഞ്ഞു കൂടുന്നു. ഗുരുതരമായേക്കാവുന്ന പുതിയ ആരോഗ്യപ്രതിസന്ധിയാണ് ലോകം നേരിടുന്നത്. ഇതിന്റെ അനന്തരഫലങ്ങളെക്കുറിച്ച് ലോകത്തിന്റെ പല ഭാഗങ്ങളിലും ഇപ്പോൾ പഠനങ്ങൾ നടക്കുകയാണ്.

എന്താണ് മൈക്രോപ്ലാസ്റ്റിക്?

അഞ്ച് മില്ലി മീറ്ററിൽ താഴെ വലുപ്പമുള്ള പ്ലാസ്റ്റിക് തരികളെയാണ് മൈക്രോ പ്ലാസ്റ്റിക് എന്നുപറയുന്നത്. കഴിഞ്ഞ കുറച്ചുവർഷങ്ങളായി ശാസ്ത്രലോകം ഏറ്റവുമധികം ചർച്ചചെയ്യുന്ന ഒരു വിഷയമാണ് മൈക്രോപ്ലാസ്റ്റിക്കുകൾ. നമ്മൾ അലസമായും മറ്റും ചുറ്റുപാടുകളിലേക്ക് വലിച്ചെറിയുന്ന പ്ലാസ്റ്റിക് മാലിന്യങ്ങൾ സൂര്യപ്രകാശം, അൾട്രാവയലറ്റ് വികിരണം, തിരമാലകൾ, പ്രകൃതിയിലെ മറ്റു വിഘടനപ്രവർത്തനങ്ങൾ എന്നിവയുടെ ഫലമായി ചെറുകണങ്ങളായി മാറുന്നു. ഇവയെയാണ്  മൈക്രോപ്ലാസ്റ്റിക്കുകൾ എന്നുവിളിക്കുന്നത് കുസാറ്റിലെ മറൈൻ മൈക്രോബയോളജി ആൻഡ് ബയോകെമിസ്ട്രി വിഭാഗത്തിലെ ബയോളജി, പ്രൊഫസറും ഡീനുമായ ഡോ. എസ്. ബിജോയ് നന്ദൻ വിശദീകരിക്കുന്നു.