જ્યાં કોમ્યુનિકેશન ગેપ નથી ત્યાં જનરેશન ગેપ નથી

બાળકો સાથેનું સમીકરણ એટલું સાલસ, પારદર્શક, તટસ્થ અને સ્થિર હોવું જોઈએ કે એને કોઈ પણ બાબતે આપણો સંપર્ક કરવામાં સંકોચ નહીં થાય. અંતર જગતનું આપણે રખોપું કરીએ, એમ બાળકોને તેમનું આંતર જગત ખીલે એવી મોકળાશ આપવી જરૂરી છે

- જિજ્ઞાસા સોલંકી

જનરેશન ગૅપને બે જુદી-જુદી પેઢીના વિચારો, માન્યતાઓ અને ક્રિયાઓમાં તફાવત તરીકે વ્યાખ્યાયિત કરી શકાય છે. જનરેશન ગૅપ દૂર કરવી હોય તો બંને પેઢી વચ્ચે સંપૂર્ણ સંતુલન શોધવાની જરૂર છે.

પ્રયાગરાજના ડૉ. પ્રકાશ ખેતાનની દીકરી નીટની પરીક્ષા આપવા માટે તૈયારી કરી રહી હતી, પરંતુ થોડા સમય બાદ દીકરીનો આત્મવિશ્વાસ ડગી ગયો અને એણે પરીક્ષા આપવાની ના પાડી. હતાશ થઈને પિતાને કહ્યું કે મારે ડૉક્ટર નથી બનવું. એ સમયે પિતાએ દીકરીએ ગુમાવેલા આત્મવિશ્વાસનો પુનઃ સંચાર કરવાનો નિર્ધાર કર્યો. પોતાના બિઝી શિડ્યુલમાંથી રોજ પાંચ કલાક કાઢીને દીકરીને જાતે ભણાવવાનું શરૂ કર્યું. એને પ્રોત્સાહિત કરવા તેમણે પણ ૪૯ વર્ષની ઉંમરે નીટની પરીક્ષા આપી. પિતા પુત્રી બંને પાસ થયા. આજે દીકરી આત્મવિશ્વાસ સાથે એમબીબીએસમાં અભ્યાસ કરી રહી છે.

ભારતીય ગ્રાન્ડ માસ્ટર રમેશબાબુ પદ્માનંદ ચેસ વર્લ્ડ કપની ફાઇનલ સુધી પહોંચ્યો. વર્લ્ડના બીજા અને ત્રીજા નંબરને હરાવીને એ ફક્ત ૧૮ વર્ષની ઉંમરે આ સ્થાન પર પહોંચ્યો. ફાઇનલમાં એ હારી ગયો, પરંતુ વર્લ્ડ નંબર વન ચેસ પ્લેયરને પણ ગજબની ટક્કર આપી. એક સાધારણ ઘરનો સાવ સાધારણ બાળક આટલી નાની વયે પોતાની પ્રતિભાથી વિશ્વમાં પ્રસિદ્ધ થયો. એની પાછળ એની માતાની સાધના છે. ચેન્નઈના રમેશબાબુને ચેસ રમવા માટે વિદેશના અનેક દેશોમાં જવું પડતું, તો મા સ્ટવ અને વાસણ લઈને દીકરા સાથે પડછાયાની જેમ રહી. એ મા દીકરાની દરેક જીતની સાક્ષી બની છે.

ઉપરનાં બંને ઉદાહરણો એવાં માતા-પિતાનાં છે, જેઓ પોતાના સંતાન માટે કંઈ પણ કરી છૂટવા તૈયાર છે. આમ તો દરેક માતા-પિતા પોતાનાં સંતાનોને બધું જ શ્રેષ્ઠ આપવાની કોશિશ કરતાં જ હોય છે.

૨૧મી સદીનું બાળક એક અલગ માહોલમાં જીવી રહ્યું છે. માતા-પિતા એક અલગ વાતાવરણમાં જન્મ્યાં હતાં, ત્યારે ઇન્ટરનેટ, વીડિયો ગેમ્સ, પબજી, ફ્રી ફાયર ગેમ્સ કે સોશિયલ મીડિયા નહોતું.

ટિન્ડર જેવી ઍપ પણ નહોતી. એક્સપોઝરના આ યુગમાં મેન્ટલ હેલ્થની વાત કરીએ તો સ્ટ્રેસ, ટૅન્શન, એન્જાઇટી, ડિપ્રેશન, સુસાઇડલ થોટ વગેરે સમસ્યા વધી ગઈ છે. એવા સમયે પેરેન્ટ્સ માટે એ મોટો પડકાર રહે કે આ અનિશ્ચિતતાના દોરમાં પોતાનાં બાળકોને કેવી રીતે સુરક્ષિત રાખી શકે.