ഉമ്മയുറങ്ങുന്ന ജന്നത്തുൽ മുഅല്ല

മക്കയിലെ ക്രെയിൻ അപകടത്തിൽ കൺമുന്നിൽ ഭാര്യയെ നഷ്ടപ്പെട്ട വേദനയിൽ ഹജ്ജ് പൂർത്തിയാക്കേണ്ടിവന്ന മുഹമ്മദ് ഇസ്മായിലും പിറ്റേവർഷം ഉമ്മയുടെ ഖബർ സന്ദർശിച്ച മക്കളും സങ്കടനിമിഷങ്ങൾ ഓർത്തെടുക്കുന്നു...

- സുബൈർ പി. ഖാദർ

മക്കയിലെ ജന്നത്തുൽ മുഅല്ലയിൽ ഉമ്മയുടെ ഖബറിടത്തിൽ നിന്ന് ആയിശ മറിയം വാരിയെടുത്ത മണൽത്തരികൾക്ക് ഉമ്മയുടെ അതേ ചൂടായിരുന്നു, ഉമ്മ അവരെ ചേർത്തു പിടിക്കുമ്പോഴുണ്ടാകുന്ന അതേ ചൂട്.

“ഞങ്ങളേക്കാളും ഭാഗ്യവാന്മാരാണല്ലോ ഈ മണൽത്തരികൾ. എപ്പോഴും ഉമ്മയെ ചേർത്തുപിടിക്കാലോ. ഉമ്മ ഇവിടെ തന്നെയുണ്ട് ഉപ്പാ, എങ്ങോട്ടും പോയിട്ടില്ല”- വാക്കുകൾ മുഴുമിപ്പിക്കാനാവാതെ ആ 11കാരിയുടെ വിതുമ്പൽ കണ്ടുനിന്നവരെയും ഈറനണിയിച്ചു. അസ്സലാമു അലൈക്കും യാ ഉമ്മീ (ഉമ്മക്ക് അല്ലാഹുവിന്റെ രക്ഷയുണ്ടാവട്ടെ)... നീട്ടിവിളിച്ച് മുട്ടുകുത്തി അവൾ ഖബറിൽ മുഖമമർത്തി... ഉപ്പയുടെ കൈപിടിച്ച് കണ്ണീരോടെ തൊട്ടടുത്ത് സഹോദരങ്ങളായ ആഷിഫും അൻസിഫുമുണ്ടായിരുന്നു. മക്കളെ ആശ്വസിപ്പിക്കാൻ കഴിയാതെ മുഹമ്മദ് ഇസ്മായിൽ ജന്നത്തുൽ മുഅല്ലയിലെ മറ്റൊരു കോണിലേക്ക് കണ്ണോടിച്ചു...

പരിശുദ്ധ ഹജ്ജിനായി തന്നെയും സഹോദരങ്ങളെയും ചേർത്തു പിടിച്ച് മുത്തം വെച്ച് കണ്ണുനിറച്ച് വീടിന്റെ പടിയിറങ്ങിയ ഉമ്മയുടെ മുഖം ആയിശയുടെ മനസ്സിലുണ്ട്. ജീവിതത്തിലിന്നു വരെ ഞങ്ങളെ പിരിഞ്ഞിരിക്കാത്ത ഉമ്മ. ഒടുക്കം ഒരു നോക്കുപോലും കാണാനാവാ തെ അവരെ വിട്ടുപോയി... അപകടശേഷം ആദ്യമായി ഉമ്മയുടെ ഖബർ സിയാറത്തിന് എത്തിയതായിരുന്നു ആ കുടുംബം.

ഹജ്ജിനു ദിവസങ്ങൾ മാത്രം ശേഷിക്കെ 2015 സെപ്റ്റംബർ 11ന് മക്കയിലുണ്ടായ ക്രെയിൻ അപകടത്തിന്റെ നടുക്കുന്ന ഓർമകൾ ഇന്നും ഈ കുടുംബത്തെ നൊമ്പരപ്പെടുത്തുന്നുണ്ട്. അപകടത്തിൽ മരിച്ച പാലക്കാട് കൽമണ്ഡപം മീനാനഗർ സ്വദേശി മുഅമിനയുടെ ഭർത്താവ് മുഹമ്മദ് ഇസ്മായിലിനും മക്കൾക്കും നടുക്കുന്ന ഓർമയാണ് ആ ഹജ്ജ് കാലം.

മക്ക ക്രെയിൻ അപകടം