ബാങ്ക് അക്കൗണ്ടുകൾ ഒരുപാട് വേണ്ട

ഏത് ബാങ്കിലൊക്കെ അക്കൗണ്ട് ഉണ്ടെന്ന് നമുക്കുതന്നെ അറിവുണ്ടാകില്ല. ലോണിനായും അല്ലാതെയുമൊക്കെ തുറന്ന അക്കൗണ്ടുകൾ ക്ലോസ് ചെയ്യാതെ കിടന്നാലും പ്രശ്നമുണ്ട്...

- പ്രമോദ് തോമസ്

ബാങ്ക് ഇടപാടുകൾ നമ്മുടെ നിത്യജീവിതത്തിന്റെ ഭാഗമാണ്. അതു കൊണ്ടുതന്നെ ബാങ്ക് അക്കൗണ്ട് നമുക്ക് ഒഴിച്ചുകൂടാൻ കഴിയാത്തതുമാണ്. എന്നാൽ, പല ആവശ്യങ്ങൾക്കായി തുടങ്ങിയ അക്കൗണ്ടുകൾ പിന്നീട് ഉപയോഗരഹിതമായി കിടപ്പുണ്ടാകും പലർക്കും. അവ അങ്ങനെ കിടക്കുന്നതുകൊണ്ട് ചില പ്രശ്നങ്ങളുണ്ട്.

ഒന്നാമത് ടെലികോളർമാർ നിങ്ങളെ വിടാതെ പിന്തുടരുന്നതിനു പിന്നിൽ ഇത്തരം ഉപയോഗരഹിതമായിക്കിടക്കുന്ന ബാങ്ക് അക്കൗണ്ടാകും. മൊബൈൽ, ഇന്റർനെറ്റ് ബാങ്കിങ് സേവനങ്ങൾ ഇപ്പോൾ നമുക്കെല്ലാം അത്യാവശ്യമാണ്. ഇവയുമായി ബന്ധപ്പെട്ട മെസേജുകളും ഇ-മെയിലുകളും നമ്മുടെ ഇൻബോക്സിൽ പെരുകുന്നത് നാം അത്ര കാര്യമാക്കുന്നുമില്ല.

യഥാർഥത്തിൽ ഇതൊക്കെ വേണ്ടതുതന്നെ ആണോ എന്ന് ചിന്തിക്കേണ്ടതുണ്ട്. ഏതെങ്കിലും ലോണിന് വേണ്ടിയോ ക്രെഡിറ്റ് കാർഡ് ലഭിക്കാനോ ഒരു പ്രത്യേക ഓഫറിന് വേണ്ടിയോ ബാങ്ക് അക്കൗ ണ്ട് തുടങ്ങിയവരുണ്ടാകും. കുറേക്കഴിയുമ്പോൾ ഇതിൽ ചിലതെല്ലാം ഉപയോഗശൂന്യമായി മാറും. എന്നാൽ, ആ അക്കൗണ്ട് നിർത്താനോ അന്വേഷിക്കാനോ നമ്മൾ മെനക്കെടാറില്ല.

ഒരാൾക്ക് എത്ര അക്കൗണ്ട്

ഒരാൾക്ക് എത്ര സേവിങ്സ് അക്കൗണ്ടുകൾ ആകാം എന്നതിന് പരിധിയില്ല. എന്നാൽ, അക്കൗണ്ടുകളുടെ എണ്ണം കൂടിയാൽ അത് മാനേജ് ചെയ്യുന്നത് ഒരു പ്രശ്നമാകും.

ഇന്ത്യയിൽ നിലവിലെ സാഹചര്യത്തിൽ വിദ്യാഭ്യാസ കാലഘട്ടത്തിൽത്തന്നെ ഒരു വിങ്സ് അക്കൗണ്ട് തുടങ്ങേണ്ടി വരുന്നു. ചില മാതാപിതാക്കൾ മക്കൾ ചെറുതായിരിക്കുമ്പോൾത്തന്നെ ബാങ്ക് അക്കൗണ്ട് അവരുടെ പേരിൽ തുടങ്ങും.