જ્યાં સિનેમા શ્વસે છે ૫૩મો આંતરરાષ્ટ્રીય ફિલ્મોત્સવ

ગોવામાં નવેમ્બરની આખરમાં યોજાઈ ગયેલા ૫૩મા ભારતીય આંતરરાષ્ટ્રીય ફિલ્મોત્સવના સમાપન સમારોહમાં જ્યુરીના વડા ઇઝરાયલના ફિલ્મ નિર્દેશક નદવ લેપિડની ‘ધ કાશ્મીર ફાઇલ્સ' ફિલ્મ વિશેની ટિપ્પણી આખરી ક્ષણોમાં વિવાદનો વિષય બની રહ્યો. જોકે ઇઝરાયલના ભારત ખાતેના રાજદૂતે પરિસ્થિતિને સંભાળી લીધી હતી. ફિલ્મોત્સવનો રસપ્રદ અહેવાલ ‘અભિયાન'ના કટાર લેખકની કલમે..

- પાર્થ દવે

ગોવાના દરિયા કિનારે આ વર્ષે, ફરી ૨૦થી ૨૮ નવેમ્બર દરમિયાન આંતરરાષ્ટ્રીય ફિલ્મોત્સવ રંગેચંગે ઊજવાયો. ભારત સરકારના મિનિસ્ટ્રી ઑફ ઇન્ફોર્મેશન ઍન્ડ બ્રૉડકાસ્ટિંગ તથા નેશનલ ફિલ્મ ડેવલોપમેન્ટ કોર્પોરેશન દ્વારા આયોજિત આ ૫૩મો ફિલ્મ સમારોહ હતો. કોવિડના ગોઝારા બે વર્ષ બાદ ગયા વર્ષે ફેસ્ટિવલ યોજાયેલો, પણ તે હાઇબ્રિડ હતો. આ વખતે પણ વર્ચ્યુઅલએક્સેસ હતું જ, તેમ છતાંય લાઇવ ઑડિયન્સ સૌથી વધુ પ્રમાણમાં આ વખતે ૫૩મા આંતરરાષ્ટ્રીય ફિલ્મોત્સવમાં હતું, પણ આ લખનારે પૂરેપૂરા, નવ દિવસ જાતજાતની ફિલ્મો, ભાતભાતની ફિલ્મોની વાતો તથા ફિલ્મીલોકો વચ્ચે પસાર કર્યા હતા. ૫૩મા આંતરરાષ્ટ્રીય ફિલ્મોત્સવના ઉદ્ઘાટન સમારોહમાં રમતગમત અને યુવા બાબતોના મંત્રી તથા માહિતી અને પ્રસારણ મંત્રી અનુરાગઠાકુરે જણાવ્યું હતું કે, ‘એશિયાનાસૌથીમોટા ફિલ્મોત્સવ એવા ઇફિનું આ ૫૩મું વર્ષ છે. અહીં ફિલ્મમૅકર, નિર્માતા તથા દેશ-દુનિયાના કલાકારોને પોતાની કૃતિ રજૂ કરવાની તક મળે છે. અમે ભારતને વૈશ્વિક કન્ટેન્ટ હબ બનાવવા માગીએ છીએ. આજે આપણે આઝાદીનો અમૃત મહોત્સવ ઊજવી રહ્યા છીએ ત્યારે અમારી ભારતને ફિલ્મમૅકર્સ, પ્રોડક્શન, પોસ્ટ પ્રોડક્શન માટે એક મોટું માર્કેટ બનાવવાની યોજના છે.’

ભારતીય ફિલ્મોનો ગુલદસ્તો!

આ વખતે ઇન્ડિયન પૅનોરમા સેક્શનમાં ૨૫ ફિલ્મો હતી. જેમાં કન્નડ ભાષાની ‘હિંદનેલેંતુ’ નામક ફિલ્મ ઓપનિંગ ફિલ્મ તરીકે હતી. પૃથ્વી કોનાનુર દિગ્દર્શિત આ ફિલ્મમાં બારમા ધોરણમાં ભણતા બે વિદ્યાર્થીની વાર્તા છે. બંને શનિવારના દિવસે, ક્લાસ પૂરા કર્યા બાદ અંતરંગ ક્ષણોને કૅમેરામાં શૂટ કરે છે. સોમવારે તેમને પ્રિન્સિપાલ દ્વારા બોલાવવામાં આવે છે અને કહેવામાં આવે છે કે, તમારો વીડિયો ઇન્ટરનેટ ઉપર ફેલાઈ ચૂક્યો છે. તેમનો પરિવાર જી જાય છે. સ્કૂલમાંથી તેમના પર પ્રતિબંધ ફરમાવવામાં આવે છે. બાદમાં તેમની જાતિને લઈને પણ પ્રશ્નો સામે આવે છે. શ્રીયન ભોંસલે અને નીરજ મેથ્યુ અભિનીત, યુવાનોના સંવેદનશીલ મુદ્દા પર વાત કરતી ‘હદિનેëતુ’ ફિલ્મ અગાઉ બુસાન ફિલ્મ ફેસ્ટિવલમાં પ્રદર્શિત થઈ ચૂકી છે.