કોલકાતા પુસ્તક મેળો એટલે પુસ્તકપ્રેમીઓનો મનગમતો ઉત્સવ!

આંતરરાષ્ટ્રીય કોલકાતા પુસ્તક મેળાની દરેક ક્ષણની વર્ચ્યુઅલ અપડેટ ગિલ્ડની વેબસાઇટ અને સોશિયલ મીડિયા પ્લૅટફૉર્મ પર રજૂ કરવામાં આવશે. પુસ્તકપ્રેમીઓને અવનવાં દૃશ્યો જોવા મળશે

- મુકેશ ઠક્કર

સ્પેનિશ શણગાર સાથે ૪૬મા આંતરરાષ્ટ્રીય કોલકાતા પુસ્તક મેળાનું આયોજન થશે. થીમ દેશ સ્પેન હોવાથી સ્પેનિશ સંસ્કૃતિનો સ્પર્શ જોવા મળશે. પણ સ્પેન પશ્ચિમ બંગાળ અને ભારતની વિદ્યા અને સંસ્કૃતિથી પ્રભાવિત છે, તેથી તેના વિરાટ પેવેલિયનમાં સ્પેન અને ભારતનું સાંસ્કૃતિક મિલન સમાવી લેવામાં આવશે.

૨૦૨૩ની તારીખો સત્તાવાર રીતે જાહેર કરવામાં આવી છે. આંતરરાષ્ટ્રીય કૉલકાતા પુસ્તક મેળો ૩૦ જાન્યુઆરીથી શરૂ થઈ ૧૨ ફેબ્રુઆરી સુધી ચાલશે. કૉલકાતા પુસ્તક મેળાની ઘોષણા પ્રસંગે સ્પેનના રાજદૂત જોસ મારિયા રિદાઓ ડોમિન્ગ્યુઝ હાજર હતા.

કૉલકાતા પુસ્તક મેળાની ઘોષણા સાથે પ્રકાશકો અને કૉલકાતાનાં પુસ્તકોના વિશ્વ બોઈ પાડામાં આનંદ છવાઈ ગયો છે. દરેક વિષયોનાં પુસ્તકો, સામયિકો, ગ્રંથો જોવા અને મેળવવા માટે પુસ્તક મેળો ભરાય ત્યારે પુસ્તકપ્રેમીઓની લાઇનો લાગે છે.

પુસ્તક મેળામાં સ્પેન ઉપરાંત દર વર્ષની જેમ દેશના પ્રકાશકો સાથે વિદેશી દેશો પણ ભાગ લેશે. આ યાદીમાં બાંગ્લાદેશ, અમેરિકા, ફ્રાન્સ, રશિયાનો સમાવેશ થાય છે. ઉપરાંત, કૉલકાતા લિટરેચર ફેસ્ટિવલ ૨૦૨૩ આંતરરાષ્ટ્રીય કૉલકાતા પુસ્તક મેળાનું એક વિશેષ આકર્ષણ છે. જે આ વખતે ૯થી ૧૨ ફેબ્રુઆરી દરમિયાન યોજાશે.