વિપક્ષ વિષમ કે વિપરીત નહીં, વિશેષ પક્ષ બને તો ખરું

પંજાબના ખેડૂતોએ જે રીતે વિરોધ કરેલો તેમાં ગુજરાતના ભાજપ વિરોધીઓએ જે સૂર પુરાવેલો, તેનાથી ગુજરાતના કેટલા ખેડૂતને સારું લાગ્યું હશે? અમેરિકામાં પણ ડાબેરીઓ એમને મત ના આપે એમને બુદ્ધિ વગરના કહે કે નકામા કહે. તમે જે પ્રજાને અક્કલ વગરની છે એવું કહો છો એ પ્રજા તમને મત આપે? વિપક્ષ સત્તા પર આવશે તો શું કરશે એ લોકોએ ડ્રીમ કરવાની જરૂર નથી, લોકોને એક્સપિરિયન્સ છે. લોકોને તમે વિપક્ષ તરીકે શું કરો છો એ જોવામાં હજુ પણ થોડો કે વધારે રસ છે

- ગૌરાંગ અમીન

હાશ, ચૂંટણીનાં પરિણામ આવ્યાં એવું બહુમતીને થયું હશે. ઘણાંને હાશ નથી થઈ. ઘણાંને તો આ વખતે પણ ચૂંટણી આવી જ ખોટી એવું લાગે છે. જી, ભાજપ વિરોધીઓ ખૂબ દુ:ખી હોય એ સ્વાભાવિક છે. વિપક્ષમાં બેસવાનું કોઈ પક્ષને ગમતું નથી. હિમાચલ પ્રદેશ ’ને એમસીડીના પરિણામથી ત્યાંના ભાજપ તરફી લોકો દુઃખી હશે. લોકશાહીમાં રાજ્ય કે દેશ ગમે તેટલી પ્રગતિ કરે, એવું શક્ય જ નથી કે પ્રજાનો એક મોટો ભાગ ચૂંટણીના પરિણામથી નારાજ ના થાય. એક ઘર કે એક કુટુંબમાં કાયમ જ બધાં એક સરખા ખુશ હોય એવું થાય છે? જીવન છે, ચાલ્યા કરે? ગુજરાતમાં વિપક્ષ જો એવું માની લે કે જીવનમાં ઉતાર ચઢાવ તો આવ્યા કરે ’ને પરિવર્તન સંસારનો નિયમ છે તો વિપક્ષે એ વિચારવું રહ્યું કે ચઢાવ એટલે શું ’ને પરિવર્તન એટલે શું? ભાજપ ’ને મોદીએ આમ સારું કર્યું ’ને તેમ સાચું કર્યું તેની ગાથા ગાતા હવે ગામ થાકવાનું નથી. સવાલ એ છે કે વિપક્ષ શું કરશે? આગલાં વર્ષોમાં જે ના કર્યું એવું ’ને કેવળ એક ધારો નકારાત્મક વિરોધ સિવાય વિપક્ષ હવે શું કરશે?

શું તમે ભાજપ વિરોધી છો? તો તમે સ્વયંને ગુજરાતીમાં કહો કે વિપક્ષ એટલે શું અથવા કોણ એ અંગે પાંચ મુદ્દા ફક્ત પોતાના માટે લખવાના હોય તો હું શું લખીશ? જો તમે ભાજપ તરફી હોય તો તમે નેતા કે કાર્યકર ના હોય એવા પાંચ ભાજપ વિરોધીને પૂછો કે વિપક્ષ એટલે? લાંબું ભાષણ નહીં. લાંબું ચિંતન નથી કરવાનું. ભાજપને કેમ મત નહીં આપવાનો ’ને વિપક્ષને કેમ આપવાનો એવાં કારણો નહીં. વિપક્ષનું વ્યક્તિત્વ શું? વિપક્ષની ઓળખ શું? વિપક્ષનો ફરજિયાત આધાર શું? આટલાં વર્ષોથી ભાજપ કરતાં વિપક્ષ કયા કયા મુદ્દે અલગ પડે છે? વિપક્ષમાં શું બદલાવ આવે તો એ આખો નવો જ ‘પક્ષ’ લાગે? ના, કોંગ્રેસ કે આપ કે કોઈ પણ બિનભાજપી પક્ષની નામજોગ વાત નથી. ભાજપ વિરોધી સાઇડની વાત છે. અજાણ્યા માણસને મળો'ને એ ભાજપ તરફી છે કે મોદી તરફી છે એવું એક કે બીજી રીતે ખબર પડીજાય. તો એવું કઈકઈરીતે ખબર પડે કે જે-તે વ્યક્તિ ભાજપ વિરોધી છે અથવા મોદીનો વિરોધી છે? આ સ્મરણમાં રાખવું.