સજના હૈ મુઝે સજના કે લીએ

વિવાહના બંધનમાં બંધાવાનો પ્રસંગ એટલે દરેક કન્યાના જીવનની મહત્ત્વની ઘડી. આખું જીવન જેની સાથે ગાળવાનું છે એવા પાત્ર સાથે જોડાવાના આ પ્રસંગમાં તે સ્વયંને શણગારવામાં પણ કોઈ કમી રાખતી નથી. દેહને ઊજળો અને આકર્ષક બનાવવાથી માંડીને પોશાકમાં તે કેટલા શણગાર સજાવે છે એની વાત કરીએ.

- ઇમરાન દલ

નવવધૂના મૅકઅપ માટે અગાઉ સાધારણ સૌંદર્યપ્રસાધનોનો ઉપયોગ થતો અને કેશમાં કૃત્રિમ ફૂલો વડે શણગાર થતો, પણ એ બધી વાતો હવે જૂની થઈ ગઈ. હવે નવવધૂના સૌંદર્યને નિખારવા માટે મૅકઅપમાં અપાર વૈવિધ્ય આવી ગયું છે. જેના પાંચ હજારથી પચાસ હજાર કે એક લાખ રૂપિયા સુધીના પેકેજ હોય છે.

પહેલાં માંડવો, જાગરણ અને દાંડિયારાસ આવા ત્રણેક પ્રસંગો પૂરતો મૅકઅપ કરવામાં આવતો. હવે પીઠી, મહેંદી, સાંજીનાં ગીતો, દાંડિયારાસ, રિસેપ્શન વગેરે જેવા બેને બદલે ચાર-પાંચ દિવસના કાર્યક્રમો થાય છે. વળી, દરેક કાર્યક્રમ માટે કન્યા જુદા જુદા પ્રકારનો મૅકઅપ કરાવે છે, જેમ કે સાદો, વૉટરપ્રૂફ, એચડી વગેરે.

પહેલાં દુલ્હનને ભપકાદાર મૅકઅપ થતો, એના બદલે હવે કન્યા આભૂષણો અને વસ્ત્રો તો ભારેખમ પહેરે છે, પણ મૅકઅપ હળવો, આછો, પારદર્શક પસંદ કરે છે. લિપસ્ટિક, આઇશેડો કરવામાં આવે પણ એમાં રંગો આછા વપરાય. ઘટ્ટ લાલ, ગુલાબી, ઓરેન્જ, જેવા રંગો લિપસ્ટિકમાં વધુ વપરાતા, એના બદલે હવે બ્રાઉનનો શેડ વધુ વપરાય છે.