પ્રજાસત્તાક દિવસની ભવ્ય ઉજવણીની ઝાંખીમાં મા દુર્ગા લોકોનું ધ્યાન ખેંચશે!

દુર્ગા પૂજા પહેલાં રાજા, જમીનદારોનાં બાગાનો અને બાડીઓમાં થતી, તે બાદ મિત્રોની પહેલ પર સાર્વજનિક ઉત્સવ બન્યો, ભવ્ય તહેવાર બન્યો, તે પણ ઝાંખીમાં સ્પષ્ટ થશે

- મુકેશ ઠક્કર

૨૬ જાન્યુઆરી, ૨૦૨૩ પ્રજાસત્તાક દિનની ઉજવણીની તૈયારીઓ જોરશોરમાં છે. આ વર્ષે પશ્ચિમ બંગાળનો ટેબ્લો પરેડમાં ભાગ લેશે. તેમાં મા દુર્ગા સરસ્વતી, લક્ષ્મી, ગણેશ અને કાર્તિક સાથે બિરાજમાન થશે.

રાજધાની નવી દિલ્હીમાં યુનેસ્કો હેરિટેજ ટાઇટલ સાથે ભવ્ય સંસ્કૃતિ શણગારનાં દર્શન થશે.

ઉલ્લેખનીય છે પશ્ચિમ બંગાળની ઝાંખીની થીમ મા દુર્ગા અને મહિલા સશક્તિકરણ છે! જે મુખ્યત્વે પશ્ચિમ બંગાળના મુખ્ય અને જનપ્રિય તહેવારને તેના અસલ રંગરૂપ સાથે આકર્ષિત કરશે.

ડિસેમ્બર ૨૦૨૧ના યુનેસ્કોએ પશ્ચિમ બંગાળના આ લોક ઉત્સવ દુર્ગા પૂજાને માનવતાનો અમૂર્ત સાંસ્કૃતિક વારસો જાહેર કર્યો હતો. દુર્ગા પૂજાને યુનેસ્કો હેરિટેજ બિરુદ એનાયત થયા પછી ૨૦૨૨ની સાર્વજનિક દુર્ગા પૂજા વિશેષ દરજ્જા સાથે ઊજવવામાં આવી હતી. ત્યાર બાદ દુર્ગા પૂજા કાર્નિવલમાં હેરિટેજ દબદબા સાથે ઉજવણી કરવામાં આવી હતી. કોલકાતામાં શ્રેષ્ઠ પૂજાઓની પ્રતિમાઓ કાર્નિવલમાં લોકોને જોવાનો અવસર મળ્યો હતો. આ ઉત્સાહ હવે નવી દિલ્હીમાં ગણતંત્ર દિવસે ફરી ધૂમ મચાવશે.