રિમેકનો બિઝનેસ બોલિવૂડને ડુબાડશે કે તારશે?

નવી હિન્દી રિમૅક ફિલ્મ વિશે જાણ્યા બાદ દર્શકોની પહેલી પ્રતિક્રિયા નકારાત્મક જ હોવાની. પહેલો વિચાર જ એ આવવાનો કે, મૂળ વિષયવસ્તુ છે જ નહીં કે શું! અને ફિલ્મરસિયાઓ અસલ ફિલ્મ વિશે જાણતા જ હોવાના. નહીં જાણતા હોય તો જાણીને, શોધીને જોઈ લેવાના!

- પાર્થ દવે

ઉત્તરાયણના દિવસે કાર્તિક આર્યન કચ્છના રણમાં આવ્યો હતો. કારણ? તેની ‘શેહઝાદા’ ફિલ્મના પ્રમોશન માટે. ૧૦મી ફેબ્રુઆરીએ રિલીઝ થનારી ‘શેહઝાદા’ ફિલ્મમાં કાર્તિક આર્યનની સાથે ક્રિતી સેનન, પરેશ રાવલ, રાજપાલ યાદવ, મનીષા કોઇરાલા, રોનિત રોય અને સચિન ખેડેકર સહિતના કલાકારો છે. દિગ્દર્શન ડેવિન ધવનના પુત્ર રોહિત ધવને કર્યું છે. એક્શન ડ્રામા ‘શેહઝાદા’માં પરિવારની, સંબંધોની વાર્તા છે.

મૂળ વાત એ છે કે, તામજામથી બનેલી અને રિલીઝ થઈ રહેલી ‘શેહઝાદા’ ૨૦૨૦માં આવેલી તેલુગુ ફિલ્મ ‘અલા વેંકુઠપુરામૂલુ’ની સત્તાવાર રિમેક છે. રસપ્રદ વાત એ છે કે, ‘શેહઝાદા’માં જે પાત્ર કાર્તિક આર્યન ભજવી રહ્યો છે તે પાત્ર ‘અલા વેંકુઠપુરામૂલુ’માં અલ્ અર્જુને ભજવ્યું હતું. અ અર્જુનની ‘અલા વેંકુઠપુરામૂલુ’ના એક વર્ષ બાદ ‘પુષ્પાઃ ધ રાઇઝ’ રિલીઝ થઈ હતી, જે ફિલ્મ બાદ તેને આખા ભારતના લોકો વધુ ઓળખતા થયા.

..અને ઓળખતા થયા માટે લોકોએ તેની ‘અલા વેંકુઠપુરમૂલુ’ ગોતી ગોતીને જોઈ લીધી! તે ફિલ્મ ટેનિકલ રીતે પણ બોલકી છે. તેમાં અલ્લુ સાથે તબુ, જયરામ, મુરલી શર્મા અને સચિન ખેડેકર સહિતના કલાકારો છે. વાત એમ છે કે, હજુ બે વર્ષ પહેલાં જ આવેલી ને સુપરહિટ સાબિત થયેલી તેલુગુ ફિલ્મની રિમેક બનાવવી કેટલી યોગ્ય છે?

પાછી અલ્લુ અર્જુનની ‘પુષ્પા’ ફિલ્મની સફળતા જોઈને, તેની રોકડી કરવા ‘અલા વેંકુઠકમૂલુ’ની પણ હિન્દી ડબ્ડ રિલીઝ કરવાનું નક્કી હતું. આ તો ભલું થજો કે તે યેનકેન પ્રકારે રોકવામાં આવ્યું, જેથી ‘શેહઝાદા’ ફિલ્મ ચાલી શકે, પણ હવે તો દક્ષિણ ભારતની તેલુગુ, તમિલ, મલયાલમ કે કન્નડ; કોઈ પણ ફિલ્મ હોય તથા અન્ય ભાષાની કે વિદેશી ફિલ્મ હોય, લોકો ઓટીટી પ્લેટફોર્મ ઉપર સબટાઇટલ્સ સાથે જોઈ લે છે. એવામાં રિમેક કરવી કેટલું યોગ્ય છે?

આ સવાલના જવાબ સુધી જઈએ એ પહેલાં આગામી દિવસોમાં બોલિવૂડમાં કેટલી રિમેક ફિલ્મો આવવાની છે તે જોઈએ.

રિમેક કા કારોબાર!