અમૃતકાળનું પ્રથમ મહત્ત્વાકાંક્ષી બજેટ

કૃષિક્ષેત્રમાં ઉત્પાદન માટે જરૂરી લોકો કરતાં વધારે લોકો સંકળાયેલા હોવાથી પણ ગ્રામીણ ક્ષેત્રોમાં સરેરાશ આવક ઓછી દેખાય છે

કેન્દ્રીય નાણાંપ્રધાન નિર્મલા સીતારામને આગામી લોકસભાની ચૂંટણી પહેલાંના આખરી પૂર્ણ બજેટમાં વંચિતો, યુવાનો, સિનિયર સિટીઝન્સ અને મહિલાઓને વિશેષ મહત્ત્વ આપતું બજેટ પ્રસ્તુત કર્યું છે. લગભગ આઠ વર્ષ પછી આવકવેરામાં મુક્તિની મર્યાદા વધારવાનું પગલું મધ્યમ વર્ગ માટે મોટી ખુશખબર માની શકાય.

ગરીબ કલ્યાણ અન્ન યોજના અંતર્ગત મફત અનાજ આપવાની સમયમર્યાદાને એક વર્ષ વધારવાથી નબળા વર્ગોને મોટી રાહત મળવાની છે. આ વર્ષે ૧૦ રાજ્યોમાં વિધાનસભાની ચૂંટણી આવી રહી છે. ત્યાર પછી, ૨૦૨૪માં લોકસભાની ચૂંટણી આવશે. તેને નજર સમક્ષ રાખીને બજેટમાં રાહતોની વર્ષા કરવામાં આવી છે.

ચીન સાથે ચાલી રહેલા વિવાદની વચ્ચે સંરક્ષણ બજેટમાં કરવામાં આવેલો વધારો આવકાર્ય છે, પરંતુ શસ્ત્રોની ખરીદી માટે વધારે નાણાંની ફાળવણી ક૨વાની જરૂર હતી.

વિરોધ પક્ષોએ આ બજેટને શબ્દોની રમત ગણાવીને તેને મોંઘવારી પર અંકુશ નહીં મૂકવાના બજેટ તરીકે ગણાવ્યું છે.

દેશમાં અત્યારે બેરોજગારી સૌથી મોટી સમસ્યા છે, પરંતુ બજેટની જોગવાઈઓથી આ સમસ્યાનું સમાધાન થવાની શક્યતા ઓછી છે.

દેશના અન્નદાતા ખેડૂતોને પણ મજબૂત બનાવવાની દિશામાં પણ બજેટમાં કોઈ મોટી રાહત જણાતી નથી.

કરવેરામાં વધારો ન કરીને સરકારે સામાન્ય માનવીને ખુશ કરવાનો પ્રયાસ કર્યો છે.