Valentine: સહિયારા શ્વાસનું સરનામું!

વીઇફે મૂછમાં મલક-મલક મલકાતાં ધીરેથી કહ્યું, ‘આજે વેલેન્ટાઇન ડે છે ને! તમે નાહી ધોઈને તૈયાર થઈ જાવ, પછી હું તમને વેલેન્ટાઇન ડેની ગિફ્ટ આપું.'

- હર્ષદ પંડ્યા ‘શબ્દપ્રીત’

ડૉ. રાજા રમન્ના જેવો ભારતીય ઑટોમિક ઇમ્પ્લોઝનનો પિતા અને પ્રખર વિજ્ઞાની એક દિવસ પિયાનો પર બેસીને ક્લાસિકલ વૅસ્ટર્ન મ્યુઝિક વગાડે છે, ત્યારે તેના સહકર્મચારીઓને આશ્ચર્ય થાય છે! ભારતીય પ્રક્ષેપકોના પિતા અને ત્રિશૂલ, પૃથ્વી, આકાશ, નાગ તેમ જ અગ્નિ જેવાં મહાશક્તિશાળી ગાઇડેડ મિસાઇલ છોડી શકનાર આ સદીના મહાવિજ્ઞાની ડૉ. એપીજે અબ્દુલ કલામ પોતાની તમિળ ભાષામાં કવિતાઓ લખે છે ત્યારે પણ તેમના સહ-વિજ્ઞાનીઓ હેરત પામી જાય છે! આમ થવાનું એક જ કારણ, કે આ બંને મહાનુભાવોએ, વિજ્ઞાનીઓ હોવા છતાં, પોતાના લોહીમાં લાગણીના લયને અને શ્વાસમાં પ્રેમની સરગમને બૂઝવી નહોતાં નાખ્યાં. મનુષ્યમાત્રને પ્રેમ કે લાગણી વ્યક્ત કરવાનો જન્મસિદ્ધ અને હૃદયસિદ્ધ અધિકાર છે, એવું આ બંને મહાનુભાવોએ જીવી બતાવીને ‘માણસ હોવા’નું સિદ્ધ કર્યું છે. પ્રેમને જાળવી રાખવા માટેનો એક જ માર્ગ છે, પણ એને વ્યક્ત કરવા માટે તો અનેક માર્ગ છે. કોઈ બોલીને વ્યક્ત કરે, કોઈ ગીત-સંગીતનો આશરો લઈને, કોઈ ફૂલ કે સ્મિતની ગિફ્ટ આપીને પોતાનો પ્રેમ વ્યક્ત કરે છે.

પ્રેમને વ્યક્ત કરવા માટે વસંત પંચમી કે વૅલેન્ટાઇન ડેની રાહ જોઈને ના બેસાય. સેન્ટ પર સેન્ટ માણસ માટે તો ‘ઍવરી ડે ઇઝ વૅલેન્ટાઇન ડે’ હોય!

આમેય મને ભૂત અને ભૂતકાળ પહેલેથી જ ગમે. લગ્ન પછી વધારે ગમવા માંડ્યાં છે. ૧૪મી ફેબ્રુઆરીની વહેલી સવારે મને ઢંઢોળતાં વાઇફે કહ્યું, ‘હવે આજે તો જરા વહેલા ઊઠો, ઊઠવાની આળસમાં ને આળસમાં તો કેટલા પાછળ રહી ગયા, તોય તમને કોઈ ભાન છે?’

‘કોણ બેભાન થયું?’ રજાઈમાંથી વન થર્ડ મોં બહાર કાઢીને મેં પૂછ્યું.

‘હું બીજું કોણ?’

‘એ તો મને વરસોથી ખબર છે.’ મેં ફરી એકવાર રજાઈમાં ગોટમોટ થઈ ટૂંટિયું વાળતાં કહ્યું.

‘એ દિવસે હું ભાનમાં રહી હોત તો જિંદગીમાં આ દહાડો જોવાનો ન આવ્યો હોત.’ ચાદર વાળતાં વાળતાં એણે કહ્યું.

‘પહેલાં મને તું એ કહે, કે તું કયા દિવસે ભાનમાં હોય છે? તું તો એ દિવસેય ભાનમાં નહોતી.’ મેં સૂતાં સૂતાં જ કહ્યું, એટલે મને પણ ભાન થયું કે, ‘એ દિવસ’ એટલે કયો દિવસ હશે? શંકાનું સમાધાન કરતાં મેં પૂછ્યું, ‘‘એ દિવસે’ એટલે કયો દિવસ?’’