ભારતનું પ્રથમ કોસમોસ વેલી ગાર્ડન હવે અમદાવાદમાં

ગુજરાતમાં જ કાશ્મીર જેવા જ ગાર્ડનની મજા માણવા મળે તો..!! વાત સાંભળીને લાગશે This is impossible, પરંતુ હવે આ પોસિબલ બન્યું છે. જી હા, અમદાવાદ કોર્પોરેશને અમદાવાદીઓને કોસમોસ વેલી ગાર્ડનની ભેટ આપી છે. આવો જાણીએ તેના વિશે..

- ગરિમા રાવ

‘દેખા એક ખ્વાબ તો યે સીલ સીલે હુએ..,’ કે પછી ‘ભમરેને ખિલાયા ફૂલ ફૂલ કો લે ગયા રાજકુવંર..’ જેવાં ગીતો જોઈને ચોક્કસથી મનમાં એવો સવાલ થાય કે આ ગીતમાં દર્શાવેલા ગાર્ડન કેટલાં સુંદર છે. એક જ જેવાં ફૂલો વચ્ચે ચાલવાની, દોડવાની, ફોટા પડાવવાની અને તેની મજા લેવાની વાત જ કંઈક જુદી હશે. કાશ આપણે પણ ત્યાં જઈ શકીએ..!, કેટલી મજા આવે.. પણ બધા માટે તે શક્ય નથી, કારણ કે ગુજરાતમાં રહેતાં લોકો તો આવા વેલી ગાર્ડનને માત્ર ફિલ્મોમાં કે પછી ફોટોગ્રાફમાં જ જોઈ શકે છે. હા, કાશ્મીર, ઉત્તરાખંડ, બેંગ્લર જેવી જગ્યાએ ફરવા જવાનું થાય અને ગાર્ડનમાં જવાનો ચાન્સ મળી જાય તે વાત અલગ છે, પરંતુ હવે અમદાવાદીઓએ નિરાશ થવાની જરૂર નથી કે નથી કાશ્મીર જવાની જરૂર, કારણ કે અમદાવાદ કોર્પોરેશન કોસમોસ વેલી ગાર્ડન હવે ઘર આંગણે લઈ આવ્યું છે. જી હા, બિલકુલ સાચી વાત છે. કાશ્મીરના શાલીમાર ગાર્ડનમાં આવેલા કોસમોસ વેલી ગાર્ડન જેવું કોસમોસ વેલી ગાર્ડન સૌ પ્રથમવાર અમદાવાદમાં બનાવવામાં આવ્યું છે.