મેડિકલ વિઝા

ઇન્ટરવ્યૂ દરમિયાન વિઝાના અરજદારોને જાતે કંઈ પણ બોલવાની, કંઈ પણ કહેવાની છૂટ નથી હોતી. ઓફ્સિરો જે સવાલો પૂછે એના જ જવાબો દ્વારા પોતાની લાયકાત પુરવાર કરવાની રહે છે

- ડો.સુધીર શાહ

આમ તો ભારતમાંથી અમેરિકા જઈને વસેલા સેંકડો ભારતીયો જેઓ અમેરિકન સિટીઝન બની ગયા છે યા ગ્રીનકાર્ડધારકો છે, તેઓ જ્યારે માંદા પડે છે અને એમની માંદગી ગંભીર હોય છે, ઑપરેશન કરાવવાની જરૂર પડે છે, ત્યારે તેઓ અમેરિકામાં તબીબી સારવાર ખૂબ જ મોંઘી હોય છે આથી એ માટે ભારત આવે છે. આથી વિરુદ્ધ અનેક ભારતીયો અસાધ્ય એવા રોગો અને શસ્ત્રક્રિયા માટે અમેરિકા જવાનું પસંદ કરે છે.

તબીબી સારવાર માટે, અમેરિકામાં શસ્ત્રક્રિયા કરાવવા માટે, ત્યાંના ડૉક્ટરો પાસે પોતાના રોગનું નિદાન કરાવવા અને પછી એનો ઉપચાર કરાવવા જે કોઈ પણ ભારતીયો અમેરિકા જવાની ઇચ્છા ધરાવે છે એમણે અમેરિકાના ‘બી-૨’ સંજ્ઞા ધરાવતા ‘વિઝિટર્સ વિઝા’ મેળવવાના રહે છે. વિઝિટર્સ વિઝા ઉપર અમેરિકામાં પ્રવેશીને પરદેશીઓ તબીબી સારવાર મેળવી શકે છે.

બી-૧ સંજ્ઞા ધરાવતા વિઝિટર્સ વિઝા મેળવવા માટે અમેરિકાના ઇમિગ્રેશન ખાતાએ નિયત કરેલ ફોર્મ ડીએસ-૧૬૦ ઓનલાઇન ભરીને સબિમટ કરવાનું રહે છે. ત્યાર બાદ એમણે ઇન્ટરવ્યૂનો સમય મેળવવાનો રહે છે. ઇન્ટરવ્યૂમાં જતાં પહેલાં બાયોમેટ્રિક્સ કરાવવાની રહે છે અને ઇન્ટરવ્યૂમાં તેઓ અમેરિકા કયા કારણસર જવા ઇચ્છે છે એ દર્શાવીને એમણે કોન્સ્યુલર ઓફિસરને એ વાતની ખાતરી કરાવીને વિઝા મેળવવાના રહે છે.