મહિલાદિને હોળી!

દરેક તહેવારમાં સ્ત્રીઓને જ આગળ કરાય છે. સ્ત્રીઓનું જ વધારે મહત્ત્વ હોય છે અને સ્ત્રીઓ જ બધા તહેવાર જોરશોરથી ઉજવતી હોય છે. એટલે જ આખા વર્ષમાં એકવાર પણ મહિલા દિન ઊજવવો જ જોઈએ

- કલ્પના દેસાઈ

‘તમને ખબર છે, આ વર્ષે મહિલાદિન અને હોળી સાથે જ આવ્યા છે?’

‘આપણને એની ક્યાં નવાઈ છે?’

‘કેમ? આમ દરેક વાતમાં વાંકું બોલવાનો તમારો નિયમ છે? સીધો જવાબ નથી અપાતો?’

‘તે આટલાં વર્ષોમાં તને ખબર જ ન પડી?’

‘હું એટલી પણ મૂરખ નથી જેટલી તમે મને સમજો છો, સમજ્યા ને?’

‘એટલી એટલે? કેટલી છે અને કેટલી નથી?’

‘પ્લીઝ! બહુ થયું હવે. હજી તો વાત શરૂ જ કરું કે, તમે તમારી હોશિયારી બતાવવાનો મોકો છોડો નહીં કેમ? બહુ હોશિયાર હતા તો..’ 

‘કેમ તારી સાથે પરણ્યો એમ જ ને?’

‘હે ભગવાન! આ માણસ વાત પણ પૂરી નથી કરવા દેતો!’

‘લે, કાયમ તો લોકો આગળ ફરિયાદ કરતી હોય કે, આ માણસના મોંમાં મગ ભર્યા છે કે શું? ઘરમાં આવે કે ટીવી જોવા જ બેસી જાય ને, હું બોલું તેમાં હું, હા, કર્યા કરે! કંઈ સમજ જ ન પડે કે શું કહેવા માગે છે! તો હમણાં વળી સાવ ઊંધી વાત કરવા બેઠી.’

‘આમ વાત ફેરવીને બધું મારે માથે ઢોળવાની ચાલાકી રહેવા દેજો. એમ તમે મૂળ વાત ભુલાવી નહીં શકો.’

‘કઈ મૂળ વાત?’

‘જો છે ને? મહિલાદિન અને હોળી સાથે આવે છે તેની વાત.’

‘હા, તો તેમાં શું? એ તો હજી અમારો પુરુષદિન નથી ઊજવાતો, નહીં તો વસંતપંચમીને જ પુરુષદિન જાહેર કરી શકાય.’

‘બધી વાતમાં અમારી બરોબરી કરવાની કે તમારી વાત ઉમેરવાની જરૂર છે?’

‘અમે તમારી બરોબરી કરીએ છીએ? કે તમે અમારી બરોબરી કરો છો? જે છો તે કેમ નથી ગમતું? મહિલાદિન ઊજવવા નીકળી પડ્યા!'

‘આ..જ આ જ મારો વાંધો છે.’

‘તને કઈ વાતમાં વાંધો નથી?’