ઈશ્વરથી થાક લાગે એવું બને તો..

ઈશ્વર સાથે આપણો સંબંધ શું? જેને એવી ખાતરી હોય કે પોતાનું એવમ સૌનું સમગ્ર જીવન ફક્ત ઈશ્વરના આધાર પર જ ચાલે છે તેમણે આવું ચિંતન કરવાની જરૂરિયાત ના હોય, પણ ઈશ્વર પોતાના જીવનમાં કેટલો ’ને કેવો રોલ કરે છે એ અંગે જેમના મનમાં ક્યારેક અસ્પષ્ટતા 'ને ચડભડ થતી હોય એ આ પ્રશ્ન પર મનોમન લાંબું તેમ જ ઊંડું ચિંતન કરે તો તેમને લાભ થાય

- ગૌરાંગ અમીન

ભલભલા ભોગી ઈશ્વરથી થાકી જાય એવું બની શકે

યોગી ’ને રોગી ઈશ્વરથી હારી જાય એવું બની શકે

ઈશ્વર મને હેરાન કરે છે. ઈશ્વર મને દુઃખ આપે છે. ઈશ્વર મને સુખ નથી આપતો. ઈશ્વરથી કંટાળો આવી ગયો છે. ઈશ્વરથી થાકી ગયા છે. આવું ક્યારેક કે ઘણી વાર જીવનમાં થયું હોય તો તે મનોભાવ એવમ વિચારને પકવવાની જરૂર છે, તે સ્થિતિ સાથે જોડાયેલા મનનું મંથન કરવાની આવશ્યકતા છે. જો ઈશ્વરની કોઈ ફરજિયાત જરૂરિયાત ના લાગતી હોય અથવા ઈશ્વર જીવનનું અનિવાર્ય આવશ્યક અંગ ના હોય તો એવા કોઈ ઉદ્ગાર કે પ્રત્યાઘાતનું જીવનમાં સ્થાન હોય જ ના. ઈશ્વર નથી એવું માનનારાને બંને હાથથી સલામ. ઈશ્વર છે અથવા કોઈ નિરાકાર સુપર પાવર છે એવું માનનારા મનુષ્યને જ કામમાં આવી શકે એવી આ વાત છે. એક પ્રકારના આસ્તિક માણસો થોડા કે વધુ ધાર્મિક હોય ’ને બહુધા સંસારી હોય છે. બીજા પ્રકારના આધ્યાત્મિકતા ને સંસારમાં વહેંચાયેલા હોય છે. એ ઓછાવધતા અંશે સાધક હોય છે ’ને ઈશ્વર પ્રાપ્તિમાં રસ ધરાવતા હોય છે. ત્રીજા પ્રકારના જીવ જીવતાજીવ શિવ બનવા મહદ્અંશે આધ્યાત્મિક હોય છે. પહેલાં 'ને બીજા પ્રકારના આસ્તિકને જ્યારે એવું લાગે કે ઈશ્વર મારો નથી, ઈશ્વર મારું સાંભળતો નથી, ઈશ્વરને મારી પડી નથી ત્યારે પોતાનું સંતુલન જાળવવા ’ને ઈશ્વર તરફ આગળ વધવા પોતે શું કરવું જોઈએ એ વિષે તે ખાસ અન્વેષણ ’ને વિશ્લેષણ કરવા લગભગ અસમર્થ હોય છે. છતાં પ્રયત્ન કરે તો માર્ગ મળી શકે છે.