થિયેટર કે ઓટીટીનો નહીં, કન્ટેન્ટનો જમાનો છે: વિક્રાંત મેસી

‘બાલિકા વધૂ’ જેવી સિરિયલ અને ‘મિર્ઝાપુર' જેવા શૉ કરનાર વિક્રાંત મેસી કહે છે કે, આજે થિયેટર (સિનેમા હૉલ)નો નહીં, પણ કન્ટેન્ટનો જમાનો છે. આજે ૩૦ સેકન્ડની રીલ પણ ચાલે છે અને ૧૦ એપિસોડિક સિરીઝ. કન્ટેન્ટનું મહત્ત્વ છે. પોતાનો શરૂઆતનો શૉ ‘ધરમ વીર’ અને તાજેતરની ફિલ્મ ‘ગેસલાઇટ’ ગુજરાતમાં શૂટ કરનાર વિક્રાંત મેસી ગુજરાત સાથેની પોતાની યાદો વાગોળે છે. તેનો એક્સક્લુઝિવ ઇન્ટરવ્યૂ પેશ છે.

- પાર્થ દવે

ટીવી તથા ફિલ્મ અભિનેતા વિક્રાંત મેસીની ‘ગેસલાઇટ’ ફિલ્મ ડિઝ્ની પ્લસ હોટસ્ટાર પર આવી રહી છે. ‘બાલિકા વધૂ'થી જાણીતા થનાર વિક્રાંતની આગામી ફિલ્મ વિજય સેતુપથી સાથેની ‘મુંબઈકર' છે. તેના સાથે ‘અભિયાન' માટે કરેલી એક્સક્લુઝિવ વાતચીત પેશ છે.

‘ગેસલાઇટ’નું શૂટિંગ ગુજરાતમાં થયું છે. કેવો રહ્યો અનુભવ?

બહુ જ સારો અને આ પહેલી વાર નથી કે મેં ગુજરાતમાં શૂટ કર્યું હોય. હું ૨૦૦૭ અને ૨૦૦૮, બે વર્ષ સતત ગુજરાત રહ્યો છું. ત્યારે હું ‘ધરમ વીર' નામનો શો કરતો હતો. હું મુંબઈમાં મોટો થયો છું, પણ ત્યારે સંપૂર્ણ ગુજરાતી થઈ ગયો હતો! અમે વડોદરા અને હાલોલમાં શૂટ કરતા હતા.

કઈ મેમરી સજડ યાદ છે?

નવરાત્રિની! આખા ગુજરાતમાં નવરાત્રિ સારી થાય છે તે ખબર છે, પણ વડોદરાની નવરાત્રિની વાત જ અલગ છે. અમે આખા દિવસનું શૂટ પતાવીને, કોસ્ચ્યુમ્સ ચેન્જ કરીને રાતના (યાદ કરીને કહે છે) અલ્કાપુરી જતા. નવેનવ દિવસ અને હું ગરબા રમતો હતો!