રાજનીતિની ખુલ્લી હવામાં રવીન્દ્ર જયંતી!

કવિગુરુ રવીન્દ્રનાથ ટાગોર પશ્ચિમ બંગાળની જેમ ઓ પાર બાંગ્લાદેશમાં પણ આદર પામ્યા છે. બંને દેશોનાં રાષ્ટ્રગીત તેમની રચના છે. કેટલાક મુદ્દા પણ બે દેશો વચ્ચે નવો કોણ સર્જી શકે છે. રાષ્ટ્રીય પરિપ્રેક્ષ્યમાં સમરસતા છે પર કેન્દ્ર અને રાજ્ય સરકારો વચ્ચે તડભડ શમતી નથી

- મુકેશ ઠક્કર

બંગાળી કૅલેન્ડર મુજબ ૨૫ વૈશાખના કવિગુરુ રવીન્દ્રનાથ ટાગોરનો જન્મ મધ્ય કોલકાતાની જોરાસાંકો રાજબાડીમાં થયો હતો.

આ વર્ષે ૨૫ વૈશાખ સાયન્સ સિટીમાં સાંસ્કૃતિક મંચ ‘ખોલા હવા’ના ઉપક્રમે ઊજવાશે. સામાન્ય રીતે કવિગુરુ રવીન્દ્રનાથ ટાગોરનો જન્મદિવસ જોરાસાંકો રાજબાડીના પ્રાંગણમાં મેળાના આયોજન સાથે ઊજવાય છે. શાંતિ નિકેતન અને વિશ્વભારતીના કલાકારો રવીન્દ્ર ગાન અને નાટક રજૂ કરે છે. અહીં એક સંગ્રહાલય છે, જ્યાં કવિને પ્રણામ કરવા લોકો ઊમટી પડે છે. ખોલા હવાએ એક અલગ પ્રકારનો સાંસ્કૃતિક કાર્યક્રમ તૈયાર કર્યો છે, જે ભૂતપૂર્વ સાંસદ ડૉ. સ્વપ્નદાસ ગુપ્તાની પરિકલ્પના પર રજૂ થશે. આ કાર્યક્રમમાં ગૃહપ્રધાન અમિત શાહ હાજર રહેશે. બંગાળી ફિલ્મોની અભિનેત્રી ઋતુપર્ણ સેનગુપ્તા, તનુશ્રી શંકર, સોમલતા આચાર્ય અને મેઘા બેનરજી આમદે૨ રવીન્દ્રનાથ કાર્યક્રમ રજૂ કરશે.

એક તરફ ખેલા હોબે રમત ચાલુ છે, તો બીજી તરફ ખોલા હવા લાવ્યું છે અમારા રવીન્દ્રનાથ!

રાજકારણમાં હજી ખુલ્લી હવા નથી, પણ ગૃહપ્રધાન અમિત શાહ છેલ્લે કોલકાતામાં અટકળો સતેજ કરી ગયા હતા કે રવિન્દ્ર જયંતીના કવિ પ્રણામ સાથે ૨૦૨૪ માટે ચૂંટણીનો નાદ ગૂંજશે!