થિયરી ઓફ લેજિસ્લેટિવ રિસ્ટ્રેન્ટ

વિશ્વના બધા જ દેશોએ ઇમિગ્રેશનનો જે સામાન્ય નિયમ ‘પુશ એન્ડ પુલ’ છે, એને બાજુએ મૂકીને ‘થિયરી ઓફ લેજિસ્લેટિવ રિસ્ટ્રેન્ટ’ અપનાવ્યો છે

- ડો.સુધીર શાહ

અમેરિકા ખંડની જ્યારે શોધ થઈ ત્યારે યુરોપ અને ઇંગ્લેન્ડમાં રાજા અને ધર્મગુરુઓ ત્યાંની પ્રજાને રંજાડતા હતા. પ્રજાનું શોષણ કરતા હતા. પ્લેગનો રોગ આ દેશોમાં ફાટી નીકળ્યો હતો. બટાટાનો દુકાળ પડ્યો હતો. આનાથી બચવા યુરોપ અને ઇંગ્લેન્ડના લોકોએ અમેરિકા પ્રત્યે દોટ મૂકી હતી. એમની જાણમાં આવ્યું હતું કે અમેરિકા ખૂબ જ અફાટ દેશ છે. ખેતીવાડી માટે ત્યાં પુષ્કળ જમીનો ઉપલબ્ધ છે. એ જમીનો ઉપર કબજો જમાવવા માટે એમને અટકાવનાર કોઈ નથી. એમની જાણમાં એ પણ આવ્યું કે અમેરિકાની ધરતીમાં પુષ્કળ ખનિજ છે અને એ દેશ વાસ્તવમાં તક અને છતનો દેશ છે.

કેલિફોર્નિયામાં સોનું જડ્યું એટલે ચીનાઓ સોનાની ખાણમાં કામ કરવા અને ધનિક ચીનાઓ એ ખાણોમાં માલિક બનવા અમેરિકા પ્રત્યે આકર્ષાયા. મજૂરોની માગ વધતા જાપાનીસ મજૂરો કામ કરવા જવા લલચાયા. એક પછી એક વિશ્વના લોકો વિવિધ કારણોસર અમેરિકા પ્રત્યે આકર્ષાયા.

ત્યાં જઈને વસેલા લોકોએ એમના શ્રમ વડે એ દેશમાં કમાવાની અનેક તકો ઊભી કરી. ધીરે ધીરે અમેરિકાએ બધી જ દિશામાં પ્રગતિ કરવા માંડી. ઇંગ્લેન્ડની ‘ઑસ્કફૉર્ડ’ અને ‘કેમ્બ્રિજ’ યુનિવર્સિટીઓ જે વિશ્વમાં પંકાતી હતી એનાથી પણ વધુ નામના અમેરિકાની ‘હાર્વર્ડ’ અને ‘સ્ટેનફર્ડ’ યુનિવર્સિટીએ મેળવી. આમ અમેરિકાએ એમને ત્યાં જે છત અને તક છે, એણે જે પ્રગતિ કરી છે, એ કારણસર વિશ્વના લોકોને પોતાને ત્યાં આકર્ષ્યા.