જીવનમાં હાસ્યનું મહત્ત્વ કેટલું? સાધનાથી લઈને ઉપચાર જેટલું..

હસવાથી શરીરમાં મેલાટોનિન નામનો હોર્મોન રિલીઝ થાય છે, જે વ્યક્તિને સારી ઊંઘ લેવામાં, ડિપ્રેશન સામે લડવામાં મદદ કરે છે. ત્વચા પરની કરચલીઓ પડવાની પ્રક્રિયા ધીમી પડે છે

- હેતલ ભટ્ટ

એક વાર બે યુવતીઓ બસમાં ઝઘડી રહી હતી. કન્ડક્ટર મામલો શાંત પાડવા વચ્ચે પડ્યા. તેમણે બંનેને પૂછ્યું કે કઈ વાત ઉપર બંને જણાં ઝઘડી રહ્યાં છે? એક યુવતીએ ઉત્તર આપ્યો કે, આ એક જ સીટ ખાલી છે. એ સીટ પર હું બેસું કે આ એ વાત ઉપર અમારો ઝઘડો ચાલે છે. કન્ડક્ટરે કહ્યું કે, બંનેમાંથી જેની ઉંમર વધારે ( મોટી) હોય એ આ સીટ પર બેસી જાય. આ સાંભળીને બંને યુવતીઓ એકદમ ચુપ થઈ ગઈ. પહેલે આપ પહેલે આપનો રાગ આલાપવા લાગી..

જો હું ઓફલાઇન રહું છું તો મને ફક્ત દાળ-રોટી, પરિવાર અને નોકરીની ચિંતા રહે છે, પણ જો હું ઓનલાઇન રહું છું તો મને દાળ-રોટી, નોકરી અને પરિવારની સાથે દેશ, ધર્મ, રાજનીતિ, સમાજ, વિશ્વ અને સમગ્ર બ્રહ્માંડની ચિંતા થવા લાગે છે.

- એક સામાન્ય ભારતીય નાગરિક 

શિક્ષક - ગોલુ, તું આટલા દિવસથી ક્યાં હતો. કેમ સ્કૂલ નહોતો આવતો?

ગોલુ – મને બર્ડ ફ્લુ થઈ ગયો હતો મૅડમ.

મૅડમ – પણ બર્ડ ફ્લુ તો પક્ષીઓને થાય.

ગોલુ - હા તો તમે મને માણસ ક્યાં સમજો છો, રોજ તો શાળાએ આવું એટલે કૂકડો બનાવીને ક્લાસ બહાર ઊભો રાખી દો છો!