પૃથ્વી પર નવો રક્તબીજ રાક્ષસ પ્લાસ્ટિકના રૂપમાં પધાર્યો છે

નોંધવાલાયક હકીકત એ છે કે પ્લાસ્ટિક જે કોઈ પણ ખાધપદાર્થ કે રસાયણના સંપર્કમાં આવે તેને ચીવટપૂર્વક શોષી લે છે. કોઈ ડબ્બામાં અથાણું ભર્યું હોય તો તેલનો લાલ રંગ એ કાયમ માટે પકડી લે છે

- વિનોદ પંડ્યા

પર્યાવરણની વાત કરીએ એટલે પ્લાસ્ટિક યાદ આવે જ. પૃથ્વીના હવામાનને, પૃથ્વી પરની ભૌગોલિક અને નૈસર્ગિક વ્યવસ્થાને ચકનાચૂર કરવા માટે પ્લાસ્ટિક ઓછું જવાબદાર નથી, પરંતુ માત્ર પ્લાસ્ટિક જ જવાબદાર છે એવું નથી. પૃથ્વીનાં અબજો વરસના ઇતિહાસમાં ન વધી હોય એટલી બુદ્ધિશાળી જીવો, અર્થાત્ માનવીની વસતિ, એ વસતિના નિભાવ અને આનંદ-પ્રમોદ માટે આનુષંગિક વૈજ્ઞાનિક આવિષ્કારો, શહેરીકરણ, ઉદ્યોગો, નેતાઓની મતબૅન્કો. ચારે તરફ આગ લગાડી છે ત્યારે શું પૃથ્વી ગરમ ન બને તો ઠંડીગાર અને નિર્મળ બને..?

પર્યાવરણની બાબતમાં કોઈ પણ સલાહ કે ચેતવણી હવે વાઘ આવ્યો.. વાઘ આવ્યો.. સમાન બની ગઈ છે. અહીં તો વાઘ આવી ગયો છે, તો પણ કોઈ ગંભીર નથી. ડોનાલ્ડ ટ્રમ્પ પ્રમુખ તરીકે ચૂંટાયા પછી નિજી અવૈજ્ઞાનિક માન્યતા, પૂર્વગ્રહોને કારણે પર્યાવરણ-સુધારની દિશામાં જે કંઈ પ્રગતિ થઈ રહી હતી તે ગાડીને ઊથલાવીને ફરીથી પાછળની ગતિએ દોડાવાનું શરૂ કર્યું. બ્રાઝિલના જે બોલ્સોનારો અને દુનિયાના જમણેરી દેશોએ એ ઊલટી દિશાના પ્રવાસને બળ આપ્યું.