એક દંપતીએ નાનકડા ગામડામાં સર્જ્યું અક્ષરવન

કોઈ ધારે તો તદ્દન સૂકી જમીન પર પણ નંદનવનનું સર્જન કરી શકે છે, તેનું ઉદાહરણ ગાંધીધામનાં દંપતીનો કર્મયજ્ઞ છે. તેમણે પોતાના વતન, અબડાસા તાલુકાના ધનાવાડા ગામમાં એક હજારથી વધુ વૃક્ષોનું વાવેતર કરીને ઘટાટોપ વન ઊભું કર્યું છે.

- સુચિતા બોઘાણી કનર

નર્મદાના પાણી કચ્છમાં પહોંચવા લાગ્યા પછી અહીંના અનિયમિત વરસાદના કારણે ઊભી થતી પાણીની તંગી ઓછી થઈ છે. પીવા માટે નર્મદા નીર મહદ્અંશે જિલ્લા ભરમાં પહોંચ્યા છે, પરંતુ સિંચાઈ માટે હજુ આખા જિલ્લામાં આ અમૃતકૃપા થઈ નથી. છતાં અનેક જગ્યાએ લોકો પોતાની સૂઝબૂઝથી, હજારો વૃક્ષો વાવીને કચ્છમાં નંદનવન ખીલવવાનો પ્રયત્ન કરી રહ્યા છે. અબડાસા તાલુકાના એક નાનકડા ગામ ધનાવાડા પાસે આવું જ એક નંદનવન - અક્ષરવન ૧૭૦ કિ.મી. દૂર ગાંધીધામ વસતાં દંપતીના પ્રયત્નોથી સર્જાયું છે.