સમભાવ ટ્રસ્ટ દ્વારા આદિવાસી વિસ્તારમાં સેવા યજ્ઞના બીજા તબક્કાનો આરંભ

સમભાવ ટ્રસ્ટે સેવાકાર્ય માટે અમીરગઢ તાલુકાની પસંદગી કરીને કુપોષિત આદિવાસી મહિલાઓની સેવાનો યજ્ઞ શરૂ કરવા બદલ ટ્રસ્ટ અને વડોદરિયા પરિવારને આરોગ્ય પ્રધાને બિરદાવ્યા હતા

બનાસકાંઠા જિલ્લાના અમીરગઢ તાલુકાના આદિવાસી વિસ્તારમાં કુપોષિત સગર્ભા મહિલાઓ સ્વાસ્થ્ય સંબંધી સેવાકાર્ય માટે સમભાવ સેવા ટ્રસ્ટ દ્વારા ચાલતા પ્રોજેક્ટના બીજા વર્ષના પ્રારંભ નિમિત્તે ૨૫મી મે ગુરુવારના રોજ વિરમપુરમાં સ્વ. ભાનુબહેન ભૂપતભાઈ વડોદરિયા સારવાર કેન્દ્ર, પ્રમુખ વિદ્યાલય ખાતે યોજાયેલા સમારોહમાં ગુજરાતના આરોગ્ય પ્રધાન ઋષિકેશ પટેલની ઉપસ્થિતિમાં અમીરગઢ તાલુકાને ટીબી મુક્ત કરવાના અભિયાનનો પણ આરંભ કરાયો હતો. સમભાવ ટ્રસ્ટના સંસ્થાપકોમાંના એક દિવંગત શૈલેષભાઈ વડોદરિયાની તસવીર સમક્ષ મીનાબહેન શૈલેષભાઈ વડોદરિયા તેમ જ ઉપસ્થિત મહાનુભાવોએ દીપ પ્રાગટ્ય કરીને કાર્યક્રમની શરૂઆત કરી હતી. આદિવાસી લોકગીતના તાલે પ્રમુખ વિદ્યાલયની કન્યાએ સુંદર સ્વાગત નૃત્ય પ્રસ્તુત કર્યાં બાદ પરંપરાગત પાઘડી પહેરાવીને મહેમાનોનું સ્વાગત કરવામાં આવ્યું હતું.