વરસાદનાં વિવિધ દેવ-દેવી

હિન્દુ શાસ્ત્રોમાં ઇંદ્રદેવની વાત વારંવાર આવે છે. વેદમાં અઢીસો જેટલી ઋચા ઇંદ્ર દેવની અર્ચના કરે છે. ઇંદ્ર દેવોના રાજા છે. ઇંદ્ર સ્વર્ગના અધિપતિ છે. ઇંદ્ર મેઘગર્જના, વીજળી, નદી તેમ જ યુદ્ધના દેવ છે

- ગૌરાંગ અમીન

વૃષ્ટિ વિના આની સૃષ્ટિ ’ને જળ વિના તેની પળ ના રહી શકે 

અલૌકિક ધારા વિના કોઈ માનવી જન્મ કે મૃત્યુ ના ધરી શકે

વરસાદની ઋતુ ચાલે છે. શ્રાવણ આવશે ’ને જન્માષ્ટમી લાવશે. ઘણાં કૃષ્ણના જન્મ સમયના ભારે વરસાદની મનોમન સફર કરશે ’ને ઘણાં કૃષ્ણએ ગોવર્ધન પર્વતને ટચલી આંગળી પર ધારણ કરી વ્રજજનોની અતિશય વર્ષા સામે રક્ષા કરી હતી એ પ્રસંગની મનોયાત્રા કરશે. ઘણાંનું તન આ ચોમાસાના સુભયાનક પ્રવેશથી સ્થિર થઈ ગયું છે. સંખ્યાબંધ મનુષ્ય ’ને અસંખ્ય જીવ આકરી વર્ષાથી હેરાન થઈ ચૂક્યા છે. એક બાજુ લોકો ચિંતામાં છે કે આ વેળા બારિશમાં બાર ના વાગી જાય તો સારું. બીજી બાજુ લોકો આનંદ ’ને ઉમંગ સાથે બરખા રાનીના પ્રવાસનાં ફળ મેળવવા આતુર છે. સમસ્ત દુનિયામાં રેઇન જીવનની મુખ્ય વેઇન છે. સિઝનનો પહેલો વરસાદ અદ્ભુત રોમાંચ આપે છે. જીવનમાં પ્રથમ વાર બાળક વરસાદ જુએ ત્યારે તે કેવું ચેતન પામે તેની કલ્પના થાય તેમ નથી. સ્પષ્ટ રીતે કોઈ પણ મનુષ્યને સમજાઈ શકે છે કે જે વર્ષા વરસે છે તે કોઈ પણ મનુષ્યએ કરેલા કામનું પરિણામ નથી. વરસાદ પૃથ્વી પર બહારથી એટલે કે હવા એવમ્ આકાશમાંથી આવે છે યા નીચે પડે છે. આદિ કાળથી માનવી માને છે કે રેઇનની આ સમસ્ત ક્રિયામાં કશુંક ડિવાઇન છે કે બધું જ ગોડલી છે.