ગુજરાતમાં તોળાતો આતંકી ખતરોઃ પાક.ના નાપાક ઇરાદા પર એટીએસની ટીમે પાણી ફેરવી દીધું

ગુજરાત એટીએસનું હ્યુમન સોર્સીસ તેમ જ આઇબીએ આપેલા ઇનપુટ એટલા જબરજસ્ત હતા કે આતંકી હુમલો થાય તે પહેલાં સમગ્ર ઘટનાનો પર્દાફાશ કરી દીધો છે

- મૌલિક પટેલ

પાકિસ્તાનમાં બેઠેલા આકાઓને હુકમ છૂટતાની સાથે જ લોકો મુંબઈના ૨૬/૧૧ના હુમલાને ભૂલી જાય તેવો મોટો હુમલો ગુજરાતમાં કરવાના ઇરાદા સાથે આવેલા આતંકવાદીઓને ગુજરાત ઍન્ટિ ટૅરરિસ્ટ સ્ક્વૉડ (એટીએસ)ની ટીમે ઝડપી લીધા છે. ગુજરાતમાં અલકાયદા અને ઇસ્લામિક સ્ટેટ ઑફ ખોરાસન પ્રોવિસન (આઇએસકેઆઇપી) આતંકવાદીઓએ પગપેસારો કર્યો છે જે આવનારા દિવસોમાં દેશનો સૌથી મોટો આતંકી હુમલો કરવાની ફિરાકમાં હતા, પરંતુ એટીએસની ટીમે પાકિસ્તાનના આકાઓના નાપાક ઇરાદાઓ પર પાણી ફેરવી દીધું છે. એટીએસની ટીમે છેલ્લા ચાર મહિનામાં અલકાયદા અને આઇએસકેઆઇપીના આતંકવાદીઓને ઝડપી પાડ્યા છે જે ગુજરાતને લોહીનાં આંસુ રોવડાવવા માટે આવ્યા હતા.

આતંકવાદ અને ડ્રગ્સ એક સિક્કાની બે બાજુઓ છે. સૌરાષ્ટ્ર-કચ્છનો દરિયાકાંઠો ૧૯૯૦ના દાયકામાં અન્ડર વર્લ્ડ દ્વારા RDX અને ગોલ્ડ સ્મગલિંગ માટે જાણીતો બન્યો હતો. પોરબંદરના ગોસાબારા દરિયાકાંઠેથી આવેલા RDXના કારણે મુંબઈમાં બૉમ્બ બ્લાસ્ટ થયા હતા. જોકે હવે આતંકીઓએ વધુ એક વખત ગુજરાતના દરિયાકાંઠાને પોતાના ટાર્ગેટ પર રાખ્યો છે. એટીએસએની ટીમે હજારો કરોડના ડ્રગ્સના જથ્થા સાથે પાકિસ્તાનીઓની ધરપકડ કરી હતી. આ ડ્રગ્સના કાળા કારોબાર સાથે આતંકવાદીઓના બદઇરાદા જોડાયા હતા. ડ્રગ્સમાં એકત્રિત થયેલાં નાણાંમાંથી આતંકવાદીઓ ગુજરાતમાં સૌથી મોટો હુમલો કરવાની ફિરાકમાં હતા.

ગુજરાત એટીએસનું હ્યુમન સોર્સીસ તેમ જ આઇબીએ આપેલા ઇનપુટ એટલા જબરજસ્ત હતા કે આતંકી હુમલો થાય તે પહેલાં સમગ્ર ઘટનાનો પર્દાફાશ કરી દીધો છે. એટીએસની ટીમે થોડા દિવસ પહેલાં અલકાયદા સાથે જોડાયેલા ત્રણ આતંકવાદીઓને રાજકોટથી ઝડપી પાડ્યા છે. આતંકવાદીઓ પાસેથી ઑટો જનરેટ ગન તેમ જ દસ જીવતા કારતૂસ જપ્ત કર્યા છે. ચાલુ વર્ષમાં એટીએસની ટીમે અમદાવાદમાંથી બાંગ્લાદેશના ચાર આતંકવાદીઓને ઝડપી પાડ્યા હતા જે અલકાયદા ઇન ઇન્ડિયન સબકોન્ટિનેન્ટ મોડ્યૂલથી જોડાયેલા હતા. જ્યારે પોરબંદરમાં ISKPનો મોડ્યૂલ મળ્યો હતો, જેમાં સુરતની મહિલા આતંકી સાથે ત્રણ આતંકીઓ ઝડપાયા હતા. જ્યારે રાજકોટમાં અલકાયદાની આઇડિયોલૉજીથી જોડાયેલા ૩ આતંકીઓ પકડાયા છે.