રતન તાતા તાજ હોટેલમાં પણ પોતાના બિલનું પેમેન્ટ જાતે કરતા હતા

• લોસ એન્જેલસમાં ગ્રેજ્યુએશન પછી ત્યાં જ નોકરીમાં લાગી ગયેલા રતન તાતા ભારત આવવા ઇચ્છતા ન હતા. • દાદીમાએ મળવાની ઇચ્છા જણાવી બોલાવ્યા અને દાદીને મળવા આવેલા રતન તાતા ફરી વિદેશ ન ગયા. • જેઆરડી તાતાએ તેમને જમશેદપુર મોકલ્યા, પરંતુ ખાસ કાળજી રાખી કે તાતા હોવાને કારણે તેમને કોઈ વિશેષ સુવિધા ન મળે. જમશેદપુરમાં રતન તાતા એપ્રેન્ટિસ હોસ્ટેલમાં રહ્યા. ફેક્ટરીએ જવા માટે કારથી નહીં, સાઇકલથી જવા કહેવાયું. • રતન તાતાએ લોખંડ ઓગાળવાની ભઠ્ઠી સહિત અનેક વિભાગોમાં કામ કરી પ્રત્યક્ષ અનુભવ મેળવ્યો. • તાતા જૂથના ચૅરમેન બન્યા પછી પણ તેમણે બે રૂમના ફલેટમાં રહેવાનું પસંદ કર્યું.

- ટીમ અભિયાન

તાતા ટ્રસ્ટના માનદ અધ્યક્ષ રતન નવલ તાતાએ આપણી વચ્ચેથી વિદાય લીધી છે. એક એવા શ્રેષ્ઠ ઉદ્યોગપતિની વિદાય કે જેમને માટે સમગ્ર ભારતના લોકો, સામાન્યજન દુઃખ-વેદના અનુભવે છે. સોશિયલ મીડિયામાં આમજનોની આવી પીડા વ્યક્ત થઈ રહી છે. કોઈ ઉદ્યોગપતિને સામાન્ય નાગરિકનો આટલો સ્વૈચ્છિક આદર મળ્યો હોય એવું પહેલીવાર જોવા મળી રહ્યું છે અને એ અકારણ પણ નથી. રતન તાતાનું વ્યક્તિત્વ તેમનો વ્યવહાર અને તેમનાં કાર્યો એટલા ઉમદા રહ્યાં છે કે લોકો તેમને દીર્ઘકાળ સુધી યાદ કરશે.