સ્વાતંત્ર્ય પર્વે ખુરશી ચિંતન!

ખુરશી ટકશે તો લોકશાહી ટકશે. લોકશાહી ટકશે તો દેશ ટકશે. દેશ ટકશે તો જનતા ટકશે અને જનતા ટકશે તો જ ખુરશી ટકશે! જેમ ઇન્દ્રાણી ઇન્દ્રાસનને વરી હતી..

- હર્ષદ પંડ્યા ‘શબ્દપ્રીત’

૧૫મી ઑગસ્ટ હોય કે ૨૬મી જાન્યુઆરી – આપણા હૃદયમાં દેશભક્તિનાં ઘોડાપૂર ઊમટતાં હોય છે. આમાં કેટલાં સાચાં અને કેટલાં અ-સાચાં, એ દરેકને મૂંઝવતો પ્રશ્ન છે. બાબુ બૉસ, જે ટાવરમાં રહે છે એનો એ એકમેવ સેક્રેટરી હોવાના કારણે એણે ‘સ્વાતંત્ર્ય પર્વે ખુરશી ચિંતન’ એ વિશે એક નિબંધસ્પર્ધાનું આયોજન કર્યું. આમ તો બાબુ જ્યારથી સેક્રેટરી બન્યો છે ત્યારથી આવા નાના-મોટા કાર્યક્રમો કરીને ટાવરના પરિવારોને પરસ્પર હળતાં-મળતાં કરતો હોય છે, જેના પરિણામે આજે આટલાં વર્ષો પછી પણ અહીંના કોઈ પરિવારને નથી તો દવાખાને જવું પડ્યું, નથી તો કોર્ટમાં જવું પડ્યું કે નથી તો પોલીસ સ્ટેશને જવું પડ્યું! આના માટે ક્રેડિટ ગોઝ ટુ બાબુ, બાબુ બૉસ!

આ વર્ષે બાબુએ જે નિબંધ સ્પર્ધાનું આયોજન કર્યું છે એ બાળકો, વિદ્યાર્થીઓ, યુવકો કે મહિલાઓ માટે નહીં, પણ પ્રૌઢો માટે કર્યું છે, કેમ કે બાબુ હંમેશાં પોતાને ‘સદાબહાર’ ગણાવતો પ્રૌઢ છે! વળી, ‘ચૅરિટી બિગિન્સ ઍટ હોમ’ એ સૂત્રમાં એ માનતો હોવાથી એણે પણ નિબંધ સ્પર્ધામાં ભાગ લીધો. તો, માણીએ એનો નિબંધ!

એક દિવસ અકબરે બીરબલને પૂછ્યું: ‘બીરબલ, કોઈ પણ દેશનો રાજા પોતાની પ્રજાને પ્રેમ કરે છે એમાં એ રાજાનો સ્વાર્થ હોય છે કે નિઃસ્વાર્થ?’ ત્યારે બીરબલે રાજકીય વિવેક બતાવતાં કહ્યું, ‘બાદશાહ સલામત, તમને સારું લાગે એવો જવાબ આપું કે જે સાચો લાગે એવો જવાબ આપું?'