વસ્ત્રોનું વિજ્ઞાન પરિધાનનું મનોવિજ્ઞાન

વસ્ત્ર પરિધાનની બાહ્ય અસરો વિશે ખૂબ ચર્ચા થઈ છે, તેની આંતરિક અસરકારકતા સમજવા જેવી છે. સ્વસ્થ રહેવા માટે આપણે ઑર્ગેનિક ફૂડને પ્રાથમિકતા આપીએ છીએ, પરંતુ વસ્ત્રો બાબતે હજુ બહુ જાગૃતિ નથી. વસ્ત્રો અને તેના પહેરનાર વચ્ચેની વાઇબ્રેશનલ ફ્રિક્વન્સી વચ્ચેની આંતરપ્રક્રિયા પર અનેક સંશોધન થયાં છે.

- પ્રિયંકા જોષી

Second skin કહી શકાય એવાં વસ્ત્રોની કેટકેટલી વિભાવનાઓ સમાજ માં પ્રવર્તે છે. સમય સાથે વસ્ત્રોએ શરીર ઢાંકવા પૂરતી જરૂરિયાત ની મર્યાદા ક્યારનીય ફગાવી દીધી છે. વસ્ત્રો પહેરાવાનો મૂળભૂત હેતુ શરીર ને રક્ષણ અને આરામ આપવાનો રહ્યો છે. પ્રાણીઓના ચામડા વીંટાળીને દેહનું રક્ષણ કરતો માનવી આજે એનિમલ ફરના જૅકેટ પહેરીને સ્ટાઇલ સ્ટેટમૅન્ટ આપે છે.

આજે વસ્ત્રો માણસના સામાજિક જીવનનો એક મહત્ત્વનો ભાગ બને ચૂક્યા છે. કોઈ પણ વ્યક્તિએ ધારણ કરેલ પરિધાનમાં તેનું વ્યક્તિત્વ, સામાજિક વર્ચસ્વ અને હોદ્દો, તેનો મિજાજ, તેની રુચિ અને તેની આંતરસૂઝ વ્યક્ત થાય છે. જાણે વસ્ત્રો માત્ર વસ્ત્રો ન રહેતાં કોઈ સમાજિક સંદેશ હોય! આ વાત અચરજ પમાડે છે, છતાં એ વાસ્તવિકતા છે.  રંગબેરંગી, જાડા-પાતળા પોતમાંથી સફાઈદાર સિલાઈ કરીને બનાવેલાં સુઘડ વસ્ત્રો દ્વારા કોઈ પણ પોતાના વ્યક્તિત્વ અને સુંદરતાને વધુ પ્રભાવક બનાવી શકે છે અને અન્યોનું ધ્યાન પોતાની તરફ આકર્ષિત કરી શકે છે તેમાં કોઈ શંકા નથી.

વસ્ત્ર પરિધાનની બાહ્ય અસરો વિશેની ચર્ચાઓ ખૂબ થઈ ચૂકી છે, પરંતુ તેની આંતરિક અસરકારકતા વિશે પણ સમજવા જેવું છે. તે અસરો આપણે વિચારીએ છીએ તેનાથી ઘણી વ્યાપક છે. કાપડના આ પોતને જડ વસ્તુ માની લેવાની ભૂલ રખે ને કરતાં! આ બાહ્ય આવરણો જેવી રીતે તેને નિહાળનારને પ્રભાવિત કરે તેવી જ રીતે તેને ધારણ કરનાર પર પણ પોતાની ચોક્કસ અસર ઉપજાવે છે. તો ચાલો જાણીએ ફેબ્રિક ફ્રિક્વન્સી એટલે કે કાપડના ઊર્જા તરંગો વિશે.

આપણે જાણીએ છીએ કે સમષ્ટિની પ્રત્યેક સજીવ-નિર્જીવ ચીજને પોતાનું આભામંડળ હોય છે, પોતાનું ચુંબકીય ક્ષેત્ર હોય છે અને તે જ રીતે તે ચોક્કસ પ્રકારના ઊર્જા તરંગો જગાવે છે. આપણા રોજિંદા જીવનનો અનિવાર્ય ભાગ તેવું કાપડ પણ તેમાંથી બાકાત નથી. જુદા-જુદા પદાર્થો થી બનેલા કાપડની ફ્રિક્વન્સી પણ જુદી-જુદી હોય છે. આ ઊર્જા તરંગો માનવ શરીર સાથે કઈ પ્રકારનો અને કેટલી માત્રામાં સુમેળ સ્થાપે છે તેના આધારે તેની સારી-નરસી અસરો માનવ શરીર પડે છે. જો તે માનવીય શરીરની ઊર્જા સાથે સુરેખતા મેળવે તો તેના સકારાત્મક પરિણામો મળે છે અને એથી વિપરીત જો તે અનુરૂપ ન હોય તો તેની ખરાબ અસરો જોઈ શકાય છે.