તેજ-તિમિર

એક અનુભવ-સમૃદ્ધ પત્રકારની વિદાય

- તરુણ દત્તાણી

સ્વસ્થ અને પ્રતિભાસંપન્ન વ્યક્તિની અણધારી વિદાય અસંખ્ય લોકોને આઘાત અને આંચકો આપી જાય છે. વરિષ્ઠ પત્રકાર દિલીપ ગોહિલની બાબતમાં આમ જ બન્યું છે.

વોટ્સએપ ગ્રૂપમાં તેમને શ્રદ્ધાંજલિનો ધોધ વહ્યો છે. પત્રકારત્વ ક્ષેત્રના લગભગ તમામ લોકોને દિલીપભાઈની ચિરવિદાય વ્યથિત કરી ગઈ છે. એ સ્વાભાવિક પણ છે. પત્રકારત્વની દુનિયામાં નિ:સ્વાર્થ અને નિર્વ્યાજ માર્ગદર્શન, સહાય, હૂંફ અને મદદ આપનાર વ્યક્તિત્વનો દુષ્કાળ પ્રવર્તે છે. એ સ્થિતિમાં દિલીપ ગોહિલ સિનિયર, જુનિયર કે નવાંગતુકને સર્વકાળે, સર્વથા ઉપલબ્ધ રહેતા. મીડિયાનાં તમામ માધ્યમોનો અનુભવ મેળવી ચૂકેલા દિલીપભાઈ કોઈ પણ માધ્યમમાં કામ કરનારને ગાઇડ કરી શકતા. આવી ક્ષમતા બહુ ઓછા લોકોમાં હોય છે. પરિચિત કે અપરિચિત અથવા અલ્પ પરિચિત પત્રકાર સાથે પણ સમાન રૂપે સાહજિકતાથી દિલીપભાઈ વર્તી શકતા હતા.