ક્યારે બનશે માંડવીનું મરિન ઇન્ટરપ્રિટેશન સેન્ટર?

કચ્છના દરિયામાં જોવા મળતી પ્રાણી અને વનસ્પતિસૃષ્ટિ લોકોને આકર્ષે છે. અત્યારે સામાન્ય માણસોને કોઈ એક જ જગ્યાએ દરિયાઈ જીવસૃષ્ટિ વિશે જાણવા મળતું નથી. પ્રવાસીઓને આકર્ષી શકાય, લોકોને દરિયાઈ જીવસૃષ્ટિથી પરિચિત કરાવી શકાય તેવા હેતુથી ગુજરાત ઇકોલૉજિકલ કમિશનની ગ્રાન્ટમાંથી વન વિભાગ દ્વારા માંડવીના દરિયા નજીક મરિન ઇન્ટરપ્રિટેશન સેન્ટર બનાવવાનું આયોજન કરાયું હતું. આ માટે લગભગ અઢી કરોડના ખર્ચે સાતેક વર્ષ પહેલાં મોટું મકાન બનાવાયું હતું, પરંતુ માળખાકીય સુવિધા વિકસાવવા માટે ગ્રાન્ટ ન ફાળવાતાં બિલ્ડિંગની અંદર કોઈ પણ નમૂના પ્રદર્શિત કરવામાં આવ્યા નથી. જો પૂરતી ગ્રાન્ટ ફાળવાય તો આ સૂચિત ઇન્ટરપ્રિટેશન સેન્ટર લોકોને કચ્છના અને કચ્છના અખાતના દરિયાઈ જીવો, ચેરિયા, સીવીડ, પરવાળા ખડકો વગેરે વિશે આધુનિક રીતે માહિતી પૂરી પાડી શકે.

- સુચિતા બોઘાણી કનર

છેલ્લા બે- અઢી દાયકાથી કચ્છમાં પ્રવાસન એક ઉદ્યોગ તરીકે સારી રીતે વિકસી રહ્યું છે. પ્રવાસીઓને અહીંનો દરિયો, સફેદ રણ અને કાળો ડુંગર જેવા ડુંગરો આકર્ષે છે. સાથે-સાથે મહેલો, પ્રાચીન સ્થાપત્યો અને મ્યુઝિયમો જોવા પણ લોકોનાં ધાડેધાડાં ઊમટે છે. પરંપરાગત ભરતકામ અને બાંધણી જેવી કલા પણ પ્રવાસીઓ માટે આકર્ષણનું કેન્દ્ર બને છે. સાથે-સાથે નવા બનેલાં આકર્ષણો જેવા કે ભુજનું સ્મૃતિવન કે અંજારનું બાળશહીદ સ્મારક પણ લોકોને પોતાની તરફ આવવા પ્રેરે છે, પરંતુ જો પ્રવાસનને વધુ ફાયદાકારક બનાવવું હોય તો વધુ ને વધુ લોકો કચ્છની મુલાકાત લે તે જરૂરી છે, તે માટે જરૂરી છે, નવાં નવાં આકર્ષણોની. કચ્છનો દરિયા કિનારો અને તેની જીવસૃષ્ટિ આવું જ નવું, લોભામણું આકર્ષણ પ્રવાસીઓ માટે બની શકે તેમ છે. આથી જ ગુજરાત ઇકોલૉજી કમિશન દ્વારા માંડવીના દરિયા કિનારાની નજીક દરિયાઈ જીવસૃષ્ટિને લોકો જાણી શકે, સમજી શકે અને માણી શકે તે હેતુથી મરિન ઇન્ટરપ્રિટેશન સેન્ટર બનાવવાનું આયોજન હાથ ધરાયું છે. પ્રોજેક્ટ તો સાતેક વર્ષ જૂનો હોવા છતાં અત્યાર સુધી માત્ર તેનું બિલ્ડિંગ બની શક્યું છે. અંદરની સુવિધાઓ વિકસાવવા, વિવિધ નમૂનાઓ પ્રદર્શિત કરવાનું કામ નાણાંના અભાવે થઈ શક્યું નથી. હવે વન વિભાગ આ કામ માટે દરખાસ્ત બનાવીને ગુજરાત ઇકોલૉજી કમિશનને મોકલવા વિચારે છે. બનતી ત્વરાએ દરખાસ્ત બનાવાય, તે મોકલાય, મંજૂર થાય અને તેના માટે પૂરતાં નાણાંની ફાળવણી થાય, વહેલી તકે કામ શરૂ થાય અને સારી ગુણવત્તા સાથે તે કામ પૂરું થાય તે જરૂરી છે.