રાજકાજ

હરિયાણામાં ભાજપની હેટ્રિક, જમ્મુ-કાશ્મીરમાં નેશનલ કોન્ફરન્સ

- ચાણક્ય

હરિયાણા અને જમ્મુ-કાશ્મીર વિધાનસભાની ચૂંટણીનાં પરિણામ આશ્ચર્યજનક તો નથી, પરંતુ બંને રાજ્યોમાં પ્રતિપક્ષને અકળાવે એવા તો જરૂર છે. હરિયાણામાં તમામ એક્ઝિટ પોલમાં ભાજપને પરાજિત બતાવવામાં આવી હતી. આ બધા એક્ઝિટ પોલ ખોટા પડ્યા છે અને એક્ઝિટ પોલ કરનારાઓ માટે મોટું આશ્ચર્ય છે, પરંતુ જે લોકો ભાજપની રાજનીતિ અને વ્યૂહરચનાને નજીકથી ઓળખે છે એ લોકો માટે હરિયાણાનું પરિણામ આશ્ચર્યજનક નથી. ચૂંટણી પ્રચાર દરમિયાન કોંગ્રેસે કિસાન, જવાન અને પહેલવાનનો મુદ્દો બહુ ઉછાળ્યો હતો. કિસાનના મુદ્દે કોંગ્રેસ ભાજપને ભીંસમાં લેતી હતી. ખાસ કરીને જાટ બિરાદરીને ભાજપથી અલગ કરવા માટે કોંગ્રેસે વ્યૂહરચના બનાવી હતી. કોંગ્રેસે અગ્નિવી૨ યોજનાને જવાનો સાથે સૌથી મોટી દગાબાજી તરીકે ઓળખાવી હતી. આવો અપપ્રચાર નિષ્ફળ નીવડ્યો છે. હરિયાણાનાં પરિણામો દર્શાવે છે કે રાજ્યમાં કિસાનો કે જવાનો કોઈ ભાજપથી નારાજ નથી. અગ્નિવીર યોજના અંગે વિપક્ષો જે નેરેટિવ સેટ કરવાનો પ્રયત્ન કરતા હતા તેની વાસ્તવિક ધરાતલ પર કોઈ અસર જોવા મળતી નથી. ભવિષ્યમાં પણ વિરોધપક્ષ માટે આ મુદ્દો બહુ ઉપયોગી રહેવાનો નથી.