રાજકાજ

મહારાષ્ટ્ર અને ઝારખંડમાં શાસક અને વિપક્ષની કસોટી

- ચાણક્ય

મહારાષ્ટ્ર અને ઝારખંડમાં વિધાનસભાની ચૂંટણીઓની તારીખો જાહેર થઈ ગઈ છે. ઝારખંડમાં બે તબક્કામાં અને મહારાષ્ટ્રમાં એક તબક્કામાં મતદાન થશે. મહારાષ્ટ્ર વિધાનસભાની કુલ ૨૮૮ બેઠકો છે, એ ગણતરીએ બહુમતી માટે કોઈ પણ પક્ષ કે ગઠબંધનને ૧૪૫ બેઠકો ઓછામાં ઓછી મળવી જોઈએ. મહારાષ્ટ્રમાં ૨૦ નવેમ્બર અને ઝારખંડમાં ૧૩ અને ૨૦ નવેમ્બરે મતદાન થશે. તાજેતરમાં હરિયાણા અને જમ્મુ-કાશ્મીર વિધાનસભાની ચૂંટણીઓ યોજાઈ ગઈ. હરિયાણામાં કોંગ્રેસ માટે અપેક્ષા કરતાં વિપરીત પરિણામો આવતાં કોંગ્રેસ હજી એ આઘાતમાંથી બહાર આવી નથી અને હવે મહારાષ્ટ્રમાં ચૂંટણીની તૈયારીઓ કરવાનું આવ્યું છે. હરિયાણાનાં પરિણામોની મતદારો ઉપર મહારાષ્ટ્રમાં અને ઝારખંડમાં મનોવૈજ્ઞાનિક અસર થવાની શક્યતા રહે છે. ચૂંટણી પરિણામોની તાસીર જોતાં લોકસભા અને ત્યાર બાદ હરિયાણા વિધાનસભાની ચૂંટણીનાં પરિણામો એક્ઝિટ પોલ કરતાં તદ્દન જુદાં આવ્યાં છે. તેના કારણે હવે એક્ઝિટ પોલ શંકાસ્પદ બની રહ્યા છે.