અવનિ લેખરા: આત્મવિશ્વાસ રાખો અને લગાવો સહી નિશાન!

સંગીતના તાલે જેનું શરીર ઝૂમી ઊઠતું એવી અગિયાર વર્ષની કન્યાએ એક અકસ્માતમાં એના પગ કાયમ માટે ગુમાવી દીધા. એ પછી દિવસોની હતાશામાંથી એ બહાર આવી અને દેશને મળી એક અવ્વલ નંબરની રાઈફલ શૂટર.

- ઉમંગ વોરા

દેશની ગુલાબી નગરી જયપુરમાં રહેતી અગિયાર વર્ષની એ છોકરી ભણવામાં હોશિયાર. નૃત્યકળામાં પણ નિપુણ. એકદમ મળતાવડી. પરિવારની લાડકી. ગોળમટોળ ચહેરો અને લાંબા વાળ. નામ એનું અવિન.. અવિન લેખરા.

હા, ગયા વર્ષે ટોકિયો પૅરાલિમ્પિક્સની ઍર રાઈફલ શૂટિંગ સ્પર્ધામાં ભારતને પહેલવહેલો ગોલ્ડ મેડલ જિતાડી આપનારી અવિન લેખરા. કોઈ પણ કારણસર શારીરિક અક્ષમતા ધરાવતા ખેલાડીઓ માટે આંતરરાષ્ટ્રીય સ્તરે ઑલિમ્પિક્સ જેવો જ રમતોત્સવ યોજાય છે, જેને પૅરાલિમ્પિક્સ તરીકે ઓળખવામાં આવે છે. ટોકિયો પેરાલિમ્પિક્સમાં તો અવનિ એક ગોલ્ડ ઉપરાંત બ્રોન્ઝ મેડલ પણ જીતી. દર ચાર વર્ષે યોજાતા પૅરાલિમ્પિક્સમાં એકથી વધુ ચંદ્રક જીતનારી અવિન પહેલી ભારતીય મહિલા ખેલાડી.

ગયા મહિને પૅરા શૂટિંગ વર્લ્ડ કપમાં પણ એ બે મેડલ જીતી. આ વખતે તો બન્ને ગોલ્ડ મેડલ હતા! એ સાથે અવિનના નામે એક વર્લ્ડ રેકૉર્ડ નોંધાયો અને વર્ષ ૨૦૨૪માં પેરિસમાં યોજાનારી પૅરાલિમ્પિક્સ માટે અવવિનએ પોતાનું નામ પણ પાક્કું કરી નાખ્યું. થોડા દિવસ પહેલાં વળી અવનિ ૧૦ મીટર ઍર રાઈફલ શૂટિંગમાં વર્લ્ડની નંબર-વન પ્લેયર બની. કોઈ ભારતીય મહિલા ખેલાડી (પૅરા) માટે આ પણ પહેલી ઘટના.

એક પછી એક સ્પર્ધા જીતવા સાથે અવનિએ (હવે વિદાય લેતા) રાષ્ટ્રપતિ રામનાથ કોવિંદના હસ્તે ‘પદ્મશ્રી’ અને ‘ખેલ રત્ન’ એવૉર્ડ મેળવ્યા.