સંભાળજો લોભ-અંધશ્રદ્ધા ક્યાંક તમારું પાકીટ સફાચટ ન કરી નાખે

સાઈબર ક્રાઈમમાં મોબાઈલ પર કૉલ કરીને વન ટાઈમ પાસવર્ડ કે બૅન્કની વિગતો માગીને ખાતાં ખાલી કરવામાં આવે છે, પણ સદેહે આવતા પાખંડીઓ અને એમના દ્વારા ફેંકવામાં આવેલી લાલચની જાળમાં ફસાતા અંધશ્રદ્ધાળુઓનું શું કરીશું?

- કેતન મિસ્ત્રી (મુંબઈ) । મહેશ શાહ (અમદાવાદ)

હવન કરો, પૈસોં કી બારિશ કરો: રૂપિયાનો વરસાદ કરવાની ખાતરી આપીને મુંબઈના વેપારીને ખોટના ખાબોચિયામાં ધકેલી દીધો.

હજી ગયા મહિનાની જ વાત. મુંબઈની પાદરે આવેલા ડોંબિવલી નજીકના એક જાણીતા બિલ્ડર. કન્સ્ટ્રક્શનના નાના-મોટા પ્રોજેક્ટ્સ કરે. પૈસેટકે સુખી ને સુખી પરિવાર. બેએક મહિના પહેલાં સુનીલ પાટીલ નામના આ મધ્યવયસ્ક બિલ્ડરને કોઈ ભક્ત ભેટી ગયા. એના કહેવા મુજબ, એ કોઈ એવા બાબાને ઓળખે છે, જેમની પાસે દૈવી શક્તિ છે. એમની એ દૈવી શક્તિથી ઘણા લોકો લખલૂંટ ધનસંપત્તિ કમાયા છે, તમે પણ કમાઈ લો. બાબાજી તમારી ઑફિસ-ઘરમાં કરોડો રૂપિયાનો વરસાદ વરસાવી શકે. રીતસરનો વરસાદ. એ માટે બાબાજી અનુષ્ઠાન કરશે.

પછી એ ભક્ત ઉમેરે છેઃ ‘અનુષ્ઠાનનો ખર્ચ વધારે નહીં થાય, માત્ર છપ્પન લાખ રૂપિયા. અનુષ્ઠાન બાદ તરત પૈસાનો વરસાદ થશે. તમારે તો ખોબલે ખોબલે એ કરોડો રૂપિયા ઉલેચી જ લેવાના.’

સુનીલભાઈ તો રાજીના રેડ. શુભ દિવસ નક્કી થયો. પ્રાતઃ કાળે પૂજા-હવન શરૂ થયાં. પૂર્ણાહુતિ બાદ બાબાજીએ કહ્યું: ‘હવે અમે આ મકાનની પ્રદક્ષિણા ફરીશું. ત્યાર બાદ પૈસાનો વરસાદ વરસવા માંડશે. તમે અહીંથી ક્યાંય જતા નહીં.’

જો કે લાંબી પ્રતીક્ષા બાદ કોઈ જ ન આવ્યું ત્યારે બિલ્ડરભાઈના મગજમાં વિચારોની પરિક્રમા શરૂ થઈ. એમને જ્ઞાન લાધ્યું કે પોતાને રીતસરનો ચૂનો ચોપડવામાં આવ્યો છે. પરિક્રમાના બહાને પેલા પાખંડી બાવાઓ રોકડા લઈને થઈ ગયા છે. એમણે તત્કાળ પોલીસફરિયાદ નોંધાવી. પાંચેક ઠગમાંથી બે પકડાયા. બીજાની શોધ ચાલુ છે. બધા પર કાળો જાદુ, નરલિ, અમાનુષી, અઘોરી કૃત્ય, વગેરે આરોપ લગાવવામાં આવ્યા છે.

આજકાલ રોજ સવારે છાપું ઉઘાડો ને કમ સે કમ એક ઠગાઈના સમાચાર વાંચવા મળે છે, જે માટે જાતજાતના કસબ વાપરવામાં આવે છેઃ તમારી વીમા પૉલિસી પાકી ગઈ છે, ઓટીપી-પાસવર્ડ આપો એટલે પૈસા તમારા ખાતામાં જમા કરી દઈએ... તમને ઈન્કમ ટૅક્સ રિફંડ આપવા માગીએ છીએ, ઓટીપી-પાસવર્ડ મોકલો... ફલાણી કંપનીની સુવર્ણજયંતી છે એટલે એ સાવ ફોગટમાં પોતાની પ્રોડક્ટ્સ આપવા માગે છે, લિન્ક પર ક્લિક કરો... વગેરે. આવા સાઈબર ક્રાઈમમાં ઠગલોકો સામેવાળાના મોબાઈલ ફોન પર આવેલા ઓટીપી-પાસવર્ડ મેળવીને એમને ખંખેરી લે છે.