શિક્ષણથી વંચિત ઉદ્યોગપતિ હવે સમાજને કરી રહ્યા છે શિક્ષણથી સિંચિત

ગરીબ પરિવારના એ દીકરાએ ત્રીજા ધોરણ પછી ભણવાનું છોડવું પડ્યું. મામાને ત્યાં ખેતરને પાણી આપવાનું કામ કરતો કરતો એ યુવાવયે હીરાનું કામ કરવા મુંબઈ આવ્યો. નોકરીમાં હડધૂત થયો, પણ નાસીપાસ થયા વગર ભાઈના કારખાનામાં એણે કામ કર્યું. પછી પોતાનો સ્વતંત્ર ધંધો કર્યો. થોડો વખત વૈરાગ્યભાવ ચડ્યો તો સંયમમાર્ગ પણ અપનાવ્યો. જો કે ઈશ્વર એની પાસે સાંસારિક જીવનમાં કંઈક કરાવવા માગતો હશે એટલે... આજે એક સફળ ઉદ્યોગપતિ હોવા ઉપરાંત એ સેંકડો આદિવાસી બાળકોને ભણાવવાના સદ્કાર્યમાં નિમિત્ત બની રહ્યા છે.

- અરવિંદ ગોંડલિયા (સુરત)

સૌરાષ્ટ્રનું નાનકડું ગામ... એક સામાન્ય ઘરમાં ખેડૂતદંપતીનાં આઠ સંતાનોમાં પાંચ દીકરા અને ત્રણ દીકરી. ખેતીની જમીન ખરી, પણ આર્થિક સ્થિતિ ખાસ સારી નહીં. પાંચ દીકરામાંથી ત્રીજા ધોરણમાં ભણતા એક બાળકને એના મામા મોસાળ લઈ જાય છે. ત્યાં એ બાળક પાટી-પેન મૂકીને ઢોર ચરાવવાનું અને ખેતરમાં પાણી વાળવાનું કામ પછી, આશરે ૨૦ વર્ષની ઉંમરે એ છોકરો મુંબઈથી હીરા ઘસવાનું કામ શીખીને સુરત આવે છે. જો કે સુરતના એક કારખાનામાં એને રોકડું પરખાવી દેવામાં આવે છે કે એનાથી આ કામ નહીં થાય અને એને નોકરીમાંથી કાઢી મૂકવામાં આવે છે.

જેને યુવાવયે નોકરીમાંથી કાઢી મૂકવામાં આવ્યો એની પાસે આજે ૫૦૦થી વધુ લોકો નોકરી કરે છે અને પોતે શિક્ષણથી વંચિત રહ્યો, પણ છેવાડાનાં બાળકો સુવિધાના અભાવે શિક્ષણથી વંચિત ન રહે એ માટે એણે ૩૦૯ આશ્રમશાળા-શિક્ષણ ભવનનો સંકલ્પ કર્યો અને એ પણ નામના મોહ વિના. આજે લોકો એમને પ્રેમથી ભગત અને કેશુભાઈ ગોટી તરીકે ઓળખે છે.

કેશુભાઈ ગોટી કે ભગત... આ નામથી સુરત-દક્ષિણ ગુજરાતમાં ભાગ્યે જ કોઈ અજાણ હશે. આજે તો એ મોટા ગજાના હીરા ઉદ્યોગકાર તરીકે ઓળખાય છે. પોતાનાં માતાના નામે શરૂ કરેલા ટ્રસ્ટના માધ્યમથી સરસ્વતીધામના નામે એ શિક્ષણસંસ્થાઓનાં નિર્માણ કરે છે. કેશુભાઈ નામનો હીરો આજે ચમકી રહ્યો છે, એનું કારણ એ છે કે કુદરતે, ઈશ્વરે એને ઘસી ઘસીને ઊજળો કર્યો છે.

સંકલ્પનો આંક વધતો જાય છે, નવા દાતા મળતા રહે છે અને નવાં નવાં સરસ્વતીધામ ઊભાં થતાં રહે છે. આવી કેટલીક શાળા હજી નિર્માણાધીન પણ છે.