યુદ્ધ નહીં, શાંતિની કરો વાત..

મોડે મોડે પણ યુક્રેન પરના રશિયાના હુમલા વિશે વડા પ્રધાન નરેન્દ્ર મોદીએ નાનું, પણ ધારદાર નિવેદન કર્યું છે. પુતિન એને ગંભીરતાથી લે કે ન લે, મોદીએ એમને ‘મન કી બાત’ સંભળાવી દીધી છે.

- હીરેન મહેતા

નરેન્દ્ર મોદી અને રશિયન પ્રમુખ વ્લાદિમીર પુતિનઃ અન્ન-ઈધણની કટોકટી માટે રશિયા તરફ કર્યો ઈશારો.

ઓછા શબ્દમાં પણ સટીક સંદેશો આપી શકાય છે. આજ કા યુગ યુદ્ધ કા હૈ નહી એવી સાફ સાફ વાત ઉચ્ચારીને વડા પ્રધાન નરેન્દ્ર મોદીએ રશિયન પ્રમુખ વ્લાદિમીર પુતિનને યુક્રેન પરના આક્રમણની નિરર્થકતા શબ્દ ચોર્યા વગર સમજાવી દીધી.

ગયા ફેબ્રુઆરીમાં રશિયાએ યુક્રેન સામે યુદ્ધ ઘોષિત કર્યું એ પછીના આટલા (સાત) મહિનામાં ભારત અને ચીન એ બે જ એવા મોટા દેશ છે, જેણે જાહેરમાં રશિયાની ટીકા કરી નહોતી. એથી ઊલટું, અમેરિકા અને એના સાથી દેશોએ રશિયા સાથે આર્થિક વ્યવહાર સ્થગિત કરવાનો નિર્ણય લીધો ત્યારે ચીન તથા ભારતે રશિયા પાસેથી ક્રૂડ ઑઈલનો વધુ જથ્થો ખરીદવાનું શરૂ કર્યું. સંયુક્ત રાષ્ટ્રસંઘમાં રશિયન આક્રમણ સામે બબ્બે વખત ઠરાવ આવ્યા ત્યારે પણ ચીન અને ભારતે એની તરફેણમાં મતદાન કરવાનું ટાળ્યું. પોતે જ હવે એક આર્થિક મહાસત્તા બની મસમોટી ફૅક્ટરી પણ છે એટલે એની સામે તો અત્યારે કોઈ દેશની કંઈ બોલવાની તાકાત નથી.