મંદિર-દરગાહના શપથની છે કોઈ કિંમત?

કોંગ્રેસના વિધાનસભ્યોને ભાજપમાં આવકાર.

રાજકારણ અને લાજ-શરમને સ્નાનસૂતકનો પણ સંબંધ નથી એ હવે કોઈને કહેવાની જરૂર નથી. રાજકારણમાં પારદર્શકતા લાવવાની વાત વચ્ચે આપણા જનપ્રતિનિધિઓ વધુ ને વધુ નિર્લજ્જ બની રહ્યા છે. એક વાર મતદારો સામે લોટાંગણ કરી આવ્યા પછીનાં પાંચ વર્ષ દરમિયાન રાજકારણીઓને એમની સામે નાલાયકી કરવામાં કોઈ છોછ નડતો નથી.

૧૯૬૬માં હરિયાણા અને પંજાબ રાજ્ય છૂટાં પડ્યાં એના પછીના જ વર્ષે ગયા લાલ નામના એક ધારાસભ્ય વિધાનસભા ચૂંટણી જીત્યાના પંદર દિવસમાં ચાર પક્ષ બદલી આયા રામ-ગયા રામ જેવો શબ્દપ્રયોગ આપણા રાજકારણમાં લાવવા માટે નિમિત્ત બની ગયા. એ પછીનાં વર્ષોમાં દરેક રાજ્યમાં, દરેક સ્તરની ચૂંટણીમાં આવા ગયા રામ આપણને જોવા મળ્યા છે. જો કે એ બધા કરતાં ચાર ચાસણી ચડી જાય એવો દાખલો હમણાં ગોવાના આઠ કોંગ્રેસી વિધાનસભ્યોએ પૂરો પાડ્યો છે.