અરજી અમારી.. સુણો સરકારશ્રી..

થોડા દિવસમાં ગુજરાતને નવી સરકાર મળશે. રાજ્યની રચનાને ૬૨ વર્ષ થયાં એ ગાળામાં ગુજરાતે ઘણો વિકાસ કર્યો છે, ઘણી સમસ્યાનું સમાધાન પણ થયું છે. જો કે હજી ઘણાં કામ બાકી પણ છે. એવાં અધૂરાં કામ, એવી લોકઈચ્છા, એવાં અપૂર્ણ સપનાં નવી સરકાર સાકાર કરે એવી આપણે તો અપેક્ષા માત્ર રાખીએ.

- કૌશિક મહેતા

ગુજરાતમાં પુનરાવર્તન થયું છે કે પરિવર્તન આવ્યું? ચિત્રલેખાનો આ અંક તમારા હાથમાં આવશે ત્યારે એ તો નક્કી થઈ ગયું હશે કે ગુજરાતમાં નવી સરકાર કયા પક્ષની બનવાની છે?

સરકાર કોઈ પણ પક્ષની આવે, પણ એની પાસે પ્રજા અપેક્ષા રાખતી હોય છે. અગાઉ આપણે રાખેલી અપેક્ષા પૂરી થઈ કે કેમ? અને હવે શું? આ સવાલો પ્રજાનાં મનમાં રહે છે અને ત્યારે સદાર આસિફનો આ શેર વાંચી જવા જેવો છે..

चलो आज़ाद हो कर कम से कम इतना तो हम सीखे

कोई सरकार आती है कोई सरकार जाती है।

ગુજરાતની સ્થાપના થયાને ૬૨ વર્ષ થયાં છે. મહાગુજરાત આંદોલન થયું એના મુખ્ય ચહેરા ઈન્દુચાચા આજની યુવા પેઢીને યાદ નથી. અરે, રાજ્યમાં ૩૫ વર્ષથી ઓછી ઉંમરના મતદારોની સંખ્યા ૩૫ ટકા છે અને એમણે ભાજપ સરકાર સિવાયની સરકાર જ જોઈ નથી! ૨૭ વરસથી ભાજપ શાસનમાં છે. (શંકરસિંહ વાઘેલા અને દિલીપ પરીખે ભલે રાષ્ટ્રીય જનતા પાર્ટીના આગેવાન તરીકે થોડો સમય સત્તા સંભાળી, પણ એ બન્ને મૂળ તો ચૂંટાયા હતા ભાજપ તરફથી). એમાંય યુવાઓની સામે તો નરેન્દ્ર મોદીનો ચહેરો જ તરવર્યા કરે છે. મોદી લોકપ્રિય છે અને મોદીએ પોતાના નામે જ ગુજરાતમાં મત માગ્યા. આ સ્થિતિમાં નવી સરકાર સત્તા સંભાળે ત્યારે લોકોની અપેક્ષા શું છે એ સરકારને કહેવું જોઈએ અને અહીં એવો જ પ્રયાસ કરવામાં આવ્યો છે.

સરકારી કામકાજમાં ભ્રષ્ટાચાર બેશક ઓછો થયો છે, પણ હજીય લોકોએ કામ કરાવવા માટે 'નૈવેદ્ય’ ધરવું પડે છે.

ગુજરાત દેશનું વિકસિત રાજ્ય છે. દેશનું ગ્રોથ એન્જિન ગણાય છે. ગુજરાતીઓ દેશમાં અને વિદેશમાં છવાયેલા છે. ગુજરાત સતત પ્રગતિ કરતું આવ્યું છે. ૧,૯૬,૦૨૪ ચોરસ મીટર વિસ્તાર ધરાવતા આ રાજ્ય પાસે શું નથી? રણ છે, દરિયો છે, પહાડો છે, જંગલ છે, તેર બંદર છે અને નવ ઍરપોર્ટ છે. સોમનાથ, દ્વારકા, અંબાજી અને પાવાગઢ જેવાં યાત્રાધામ છે. હજારો વર્ષના ઈતિહાસના સાક્ષી એવા લોથલ અને ધોળાવીરા છે. એશિયાઈ સિંહોનું ધામ ગીર છે. એ સહિત ચાર રાષ્ટ્રીય ઉદ્યાનો છે. દેશના અર્થતંત્રમાં ગુજરાતનો હિસ્સો . મજબૂત છે. રાષ્ટ્રીય આવકમાં ગુજરાતનો ફાળો આઠ ટકા જેટલો છે. સરદાર અને ગાંધીજી જેવા નેતા આ રાજ્યએ આપ્યા છે અને આજે નરેન્દ્ર મોદી અને અમિત શાહ દિલ્હીમાં રાજ કરે છે.