ગુજરાતના આર્થિક વિકાસની ગાડીને કેટલો વેગ મળશે?

વિધાનસભા ચૂંટણીમાં ભાજપની જીતને પગલે ગુજરાતમાં આર્થિક ક્ષેત્રે પણ નવાં પરિણામ-પરિમાણ જોવા મળશે એવી આશા સંગીન બની રહી છે. માત્ર દેશમાં જ નહીં, વિશ્વના તખ્તા પર પણ ગુજરાતનું નામ બોલાય એવા મિશન સાથે આ રાજ્ય હવે પછી નવા ટ્રાન્સફોર્મેશન તરફ આગળ વધશે, આ રહ્યાં કારણ..

- જયેશ ચિતલિયા

નરેન્દ્ર મોદીએ ગુજરાતમાં ભાજપની જીતનો ડંકો વગાડ્યો, હવે આર્થિક ક્ષેત્રે પણ ઢોલ-નગારાં વાગશે.

આગામી પાંચથી દસ વરસમાં ગુજરાત ભારત માટે એક મોડલ સ્ટેટ તરીકે ઊભરશે. બીજાં રાજ્યો ગુજરાતને અનુસરવાનું પસંદ કરશે. સાતત્યપૂર્ણ, સમતોલ અને સિસ્ટેમેટિક વિકાસનું ઉદાહરણ બનેલું ગુજરાત આગામી વરસોમાં સાવ નોખું સ્વરૂપ ધારણ કરશે. આ નવા સ્વરૂપમાં ગુજરાત ગ્લોબલ સ્તરે પણ એક નવી ગરિમા સાથે ઊભું હશે..

આ આશાસ્પદ વિધાનો તાજેતરમાં ગુજરાત વિશેની ચર્ચાના વિષય બન્યાં છે. ગુજરાતમાં ભારતીય જનતા પાર્ટીની જીત સાથે રાજકીય ઢોલ-નગારાં બાદ હવે આર્થિક ઢોલ-નગારાં વાગશે એવી આશા છે. ભાજપની આ ભવ્ય જીત બાદ ગુજરાતના આર્થિક-ઔદ્યોગિક વિકાસને નવી ગતિ-નવી દિશા મળશે. ગુજરાત પર વડા પ્રધાન નરેન્દ્ર મોદીનો વિશેષ પ્રેમભાવ હોવાનું જાહેર છે. ગુજરાતના ઝડપી વિકાસનું આ પણ એક મહત્ત્વનું કારણ અને પરિબળ છે.

ચાલો, જોઈએ આ વિષયમાં ગુજરાતની સોશિયો-ઈકોનોમીનો અભ્યાસ ધરાવતા નિષ્ણાતો શું કહે છે..

રોજગારસર્જન પર વધુ ધ્યાન જરૂરી

અમદાવાદસ્થિત મૅનેજમેન્ટ એક્સ્પર્ટ અને ઈકોનોમિસ્ટ નયન પરીખ ચિત્રલેખા સાથેની વાતચીતમાં કહે છેઃ

‘ભાજપને આ વખતે જે જીત પ્રાપ્ત થઈ છે ત્યારે જો સરકાર રાજકીય ઉદ્દેશો કે કથિત રમતોને બાજુએ મૂકી અમુક બોલ્ડ નિર્ણય લે તો ગુજરાતનું ખરેખર વધુ હિત થઈ શકે છે. ગુજરાતમાં વિકાસ થઈ રહ્યો છે, પરંતુ એની સામે રોજગારસર્જનની મર્યાદા છે. આના પર વધુ જોર આપવાની જરૂર છે. ભાજપની જીત બાદ આ વખતે કોઈ મજબૂત વિરોધ પક્ષ રહ્યો નથી, જે એક રીતે આવકાર્ય ન ગણાય, તંદુરસ્ત વિરોધ લોકશાહીનું પ્રેરક બળ બનતો હોય છે. જો કે ભાજપ એનો ગેરલાભ લેવાને બદલે ગુજરાતની પ્રજાનાં હિતમાં પિચની બહાર જઈને પણ બૅટિંગ કરી શકે છે. હવે ગુજરાત સરકાર માટે નવા કાનૂન પસાર કરાવવાનું વધુ સરળ અને ઝડપી બનશે. ભાજપ સરકાર આ વિષયમાં ગુડ ગવર્નન્સ સાથે સર્વાંગી હિતમાં આગળ વધશે એવી આશા રાખીએ.’

સંરક્ષણ ક્ષેત્રે પણ તોપ ગાજશે

ગુજરાતની સમૃદ્ધિનું કારણ છે એની પ્રગતિ. આ એક ઉમદા દાખલો છે, જે બીજાં રાજ્યોમાં પણ થાય તો સોનામાં સુગંધ ભળે એમ જણાવતાં બ્રોકરેજ-ફાઈનાન્સિયલ અગ્રણી હાઉસ કેઆર ચોકસી હોલ્ડિંગના મૅનેજિંગ ડિરેક્ટર : દેવેન ચોકસી ચિત્રલેખાને કહે છે: