અધ્યાત્મની અનુભૂતિ.. નિર્મળ આનંદનો સ્પર્શ

જૈનાચાર્યના વિક્રમસર્જક ચારસોમા પુસ્તકનું વિમોચન તથા ગિરનારની પ્રતિકૃતિ સહિત ‘સ્પર્શ મહોત્સવ’નાં અનેક આકર્ષણ.

- મહેશ શાહ (અમદાવાદ)

કેટલાંક પુસ્તકના વિમોચન પ્રસંગ ઘટના બની જતા હોય છે. આવી એક ઘટના આકાર લેશે બાવીસ જાન્યુઆરીએ અમદાવાદમાં. આ મંગળ દિવસે છે એક જીવનમૂલક ગુજરાતી પુસ્તક સ્પર્શનો વિમોચન અવસર. વિમોચન પ્રસંગે પુસ્તકના નામને સાર્થક કરતો સ્પર્શ મહોત્સવ અમદાવાદમાં ૧૫ જાન્યુઆરીથી શરૂ થયો, જે ૨૬ જાન્યુઆરીએ પૂર્ણ થશે. આ જ દિવસે અહીં આઠ મુમુક્ષુ દીક્ષા પણ લેશે.

આ ઘટનાની ચાર વિશેષતા છે, જેમ કે:

> પદ્મભૂષણથી સમ્માનિત વિખ્યાત જૈન આચાર્ય ભગવંત શ્રીમદવિજય રત્નસુંદરસૂરિ મહારાજ સાહેબનું આ ચારસોમું પુસ્તક છે.

> ૨૦ જાન્યુઆરીએ એમનાં ચારસો પુસ્તકોનો અમદાવાદમાં શાહી વરઘોડો નીકળશે.

> બાવીસ જાન્યુઆરીએ અમદાવાદ ઉપરાંત અગિયાર દેશમાં પણ વર્ચ્યુઅલ વિમોચન થશે.

> આ પુસ્તક ગુજરાતી સહિત ૧૫ ભાષામાં પ્રગટ થશે.

આ છે ‘સ્પર્શ નગરી’: પ્રસિદ્ધ તીર્થધામ ગિરનારની પ્રતિકૃતિ ઉપરાંત અહીં છે રત્ન સફારી અને રત્ન યુનિવર્સ સહિત જુદી જુદી થીમના પ્રદર્શન ખંડ. બાળકોને ધર્મના સંસ્કાર મળે અને માનવજીવનની સમજ પણ મળે.

ઉલ્લેખનીય છે કે લેખક-પ્રવચનકાર ગુરુદેવ રત્નસુંદરસૂરિના એકસોમા પુસ્તકનું ૧૯૯૭માં માટુંગા-મુંબઈમાં વિમોચન થયું હતું. ત્યાર બાદ ૨૦૦૬માં બસ્સોમા પુસ્તકનું વિમોચન દિલ્હીમાં તથા ત્રણસોમા પુસ્તકનું વિમોચન ૨૦૧૬માં સાયન, મુંબઈમાં થયું હતું.

અનેક લોકોનાં જીવન બદલી નાખતાં હૃદયસોંસરવાં ઊતરી જતાં ચોટદાર સુવાક્યો એ આ જૈન આચાર્યનાં પુસ્તકોની વિશેષતા છે. ૮૦ જેટલા વિષયો પર લખાયેલાં, વિવિધ ભાષામાં અનુવાદિત થયેલાં પુસ્તકોનાં વેચાણનો આંક એક કરોડને વટાવી ગયો છે. લખી રાખજો, આરસની તક્તી પર.. પુસ્તક દેશ-વિદેશની સોળ ભાષામાં અનુવાદિત થયું.