આ શિક્ષક સાથે તો બાળકોને આવે છે મોજ..

રેડિયોના સ્ક્રિપ્ટ રાઈટરમાંથી એ જામનગરની મ્યુનિસિપલ સ્કૂલમાં શિક્ષક બન્યા, એવા શિક્ષક જેમને બાળકો ગમે છે અને એથીય વિશેષ તો એ બાળકોને ગમે છે. બાળસાહિત્યના ક્ષેત્રે ‘ટોપીવાળી મા’ તરીકે ઓળખાતા કિરીટ ગોસ્વામી બાળકોને માતૃભાષા સાથે જોડી રાખવાનું ઉમદા કાર્ય કરી રહ્યા છે.

- કેતન ત્રિવેદી (અમદાવાદ)

હવેથી ગુજરાત રાજ્યની તમામ શાળામાં આઠમા ધોરણ સધી ગજરાતી એક વિષય તરીકે ફરિજયાત ભણાવવામાં આવશે એવો એક કાયદો હમણાં ગુજરાતની વિધાનસભામાં પસાર કરવામાં આવ્યો. એક ગુજરાતી તરીકે આપણને સૌને એ વાતે આનંદ થાય કે હાશ, આ બહાને તો આ બહાને, માતૃભાષાની જાળવણી-સંવર્ધનના કામમાં મદદ તો મળશે!

સારી વાત છે, પણ સવાલ એ છે કે આટલી મોટી સંખ્યામાં શાળાઓમાં ગુજરાતી ભણાવી શકે એટલા શિક્ષકો આપણી પાસે છે ખરા? અને માનો કે છે તો એમાંથી સાચું અને સારું ગુજરાતી ભણાવી શકે એવા સજ્જ શિક્ષકો કેટલા?

આમ તો ગુજરાતી ભાષા માટે પ્રતિબદ્ધ હોય અને ભણાવવા માટે સજ્જ હોય એવા શિક્ષકો તો દીવો લઈને શોધવા જવું પડે એવી હાલત છે, પણ હા, શોધવાનો પ્રયત્ન કરીએ તો એક દીવો આપણને સૌરાષ્ટ્રના જામનગર શહેરમાં આવેલી મ્યુનિસિપલ હાઈ સ્કૂલ તરફ ખેંચી જાય છે, જ્યાં એક શિક્ષક માતૃભાષાના શિક્ષણનું અજવાળું પાથરવાનું સરસ કામ કરી રહ્યા છે.

આ શિક્ષક એટલે કિરીટ ગોસ્વામી. જામનગર મહાપાલિકા સંચાલિત હાઈ સ્કૂલમાં ગુજરાતી અને ચિત્રકામ વિષય ભણાવતા કિરીટભાઈની પ્રથમ ઓળખ આમ તો ગુજરાતી ભાષાના જાણીતા બાળગીતકાર અને વાર્તાકાર તરીકેની છે. ગુજરાતી અખબારોની બાળકો માટેની પૂર્તિમાં તમે એમની વાર્તાઓ પણ વાંચતા જ હશો, પણ સાથે જોડી રાખીને નવી પેઢીમાં ગુજરાતી ભાષાને જીવંત રાખવા માટે પણ એ અનુકરણીય પ્રવૃત્તિ કરી રહ્યા છે એ એમની બીજી ઓળખ છે. એમની આ પ્રવૃત્તિના લીધે ગુજરાતના બાળસાહિત્ય-શિક્ષણના ક્ષેત્રે હવે લોકો એમને ટોપીવાળી મા કે પછી આધુનિક ગીજુભાઈ તરીકે ઓળખવા માંડ્યા છે. ટોપીવાળી મા એટલા માટે કે ટોપી એ કિરીટભાઈની ત્રીજી ઓળખ છે!