உள்துறைக் குழு பயிற்சிக் கழகத்தின் முதல் அறிவார்ந்த வகுப்பறை

செயற்கை நுண்ணறிவு - மிகைமெய் காணொளிக் கருவி, உணர்திறன் விளக்கொளி உள்ளிட்ட நவீன தொழில்நுட்பங்களைக் கொண்ட உள்துறைக் குழு பயிற்சிக் கழகத்தின் முதல் அறிவார்ந்த வகுப்பறை வியாழக்கிழமை (செப்டம்பர் 19) அதிகாரபூர்வ அறிமுகம் கண்டது.

உள்துறைக் குழு பயிற்சி உன்னத விருது வழங்கும் நிகழ்ச்சியில் பங்கேற்ற உள்துறை துணை அமைச்சர் முஹம்மது ஃபைஷால் இப்ராஹிம் வகுப்பறையை அறிமுகம் செய்தார்.

மேம்படுத்தப்பட்ட அறிவார்ந்த வகுப்பறைகள் உள்துறைக் குழுவின் பயிற்சியின் தரத்தை தொடர்ந்து உயர்த்தும் இலக்குக்கு உறுதுணையாக இருக்கும். பயிற்சியாளர்கள் பயனுள்ள, ஈடுபடுத்தும் கற்றல் அனுபவங்களை வழங்க தேவையான வசதிகளை இது கொண்டுள்ளது என்றார் அவர்.

நேரடி, மெய்நிகர், இரண்டும் இணைந்த பயிற்சிகளை வழங்கும் வசதியைக் கொண்டது இவ்வகுப்பறைகள். 2025 செப்டம்பருக்குள் முதல் 31 வகுப்பறைகளை உள்துறைக் குழு அமைக்கும்.

அண்மைய தொழில்நுட்பம், வளங்களை உள்துறைக் குழு பயிற்சியாளர்களுக்கு அளிப்பதில் குழு உறுதிபூண்டுள்ளதாக உள்துறைக் குழுவின் தலைமை நிர்வாகியான திரு. அன்வர் அப்துல்லா கூறினார்.