മുകളിൽ ആകാശം താഴെ രാജവീഥി

ചരിത്രവും പൈതൃകവും ഉറങ്ങുന്ന തലസ്ഥാനനഗരിയുടെ രാജവീഥിയിലൂടെ ബസ്സിന്റെ മട്ടുപ്പാവിലിരുന്ന് യാത്ര ചെയ്യാം... രാജഭരണകാലത്തെ നിർമിതികളും ആധുനികതയും സമ്മേളിക്കുന്ന നഗരക്കാഴ്ചകൾ...

- SREEKANTH

തിരുവനന്തപുരം നഗരത്തിലെ എൽ.എം.എസ്. ജങ്ഷനിലെ വിളക്കുകാൽ ചൂണ്ടി കണ്ടക്ടർ ചോദിച്ചു, “ഈ കാണുന്നത് എന്താണെന്ന് ആർക്കെങ്കിലും അറിയാമോ?'' കൂടെയുള്ള തിരുവനന്തപുരംകാർ പോലും കൈമലർത്തി. “ഇതാണ് രാമരായർ വിളക്ക്. നൂറ്ററുപതുവർഷം പഴക്കമുണ്ടിതിന്. ഇവിടം മുതൽ കവടിയാർ കൊട്ടാരം വരെ നൂറ് വിളക്കുകളാണുണ്ടായിരുന്നത്. ഇപ്പോൾ അവശേഷിക്കുന്നത് ഇതുമാത്രം. രാജഭരണകാലത്തെ രാത്രിനഗരത്തിന്റെ വെളിച്ചമായിരുന്നു ഈ മണ്ണെണ്ണ വിളക്ക്.

കണ്ണഞ്ചിപ്പിക്കുന്ന നഗരവെളിച്ചത്തിൽ ഏവരും ആ മണ്ണണ്ണവിളക്കിന്റെ ചിത്രം മൊബൈലിൽ പകർത്തി. മ്യൂസിയത്തിന്റെ പുറംകാഴ്ച കാട്ടി പതിയെ ബസ് നീങ്ങുമ്പോൾ താഴെ ആളുകൾ ഇരുനിലബസ്സിനെ കൗതുകത്തോടെ നോക്കുന്നതു കാണാം. ചിലർ തുറന്ന രണ്ടാം നിലയുള്ള ഡബിൾ ഡെക്കറിന്റെ ഫോട്ടോയെടുക്കുന്നു.

രാജപാതയിലൂടെയുള്ള യാത്രയിൽ വിദൂരമായൊരു കുതിരക്കുളമ്പടിയൊച്ച കേൾക്കുന്നതായി തോന്നും. തൊട്ടടുത്ത നിമിഷം ആധുനികനഗരത്തിരക്കിന്റെ നിറങ്ങളും ശബ്ദങ്ങളും വന്നുകയറും. ഈ ബസ്സിൽ 250 രൂപയ്ക്കൊരു ടിക്കറ്റെടുത്താൽ നൂറ്റാണ്ടുകൾ പഴക്കമുള്ള തിരുവിതാംകൂർ ചരിത്രപ്രൗഢിയും സംസ്കാരവും മുതൽ തലസ്ഥാനനഗരത്തിന്റെ ആധുനികമുഖംവരെ ഒറ്റയാത്രയിൽ ആസ്വദിക്കാം. പാതവക്കുകളിൽ രാജഭരണത്തിന്റെ ശേഷിപ്പുകൾ പൈതൃകക്കാ ഴ്ചകളാകും. ഒപ്പം ഷോപ്പിങ് മാളുകളും ആർക്കിടെക്റ്റ് വിസ്മയങ്ങളായ കെട്ടിടങ്ങളും റോഡിനിരുവശവും ഓടിമറയും.

തലസ്ഥാനനഗരിയിൽ എത്തിച്ചേരുന്ന വിനോദസഞ്ചാരികൾക്കായി കെ.എസ്.ആർ.ടി.സി. പ്രത്യേകം തയ്യാറാക്കിയ ഡബിൾ ഡെക്കർ ബസ് സർവീസാണിത്. കെ.എസ്.ആർ.ടി.സി.യുടെ ബജറ്റ് ടൂറിസം പദ്ധതിയു ടെ ഭാഗമായാണ് മുപ്പത്തിരണ്ടുവർഷമായി നഗരത്തിൽ സർവീസ് നടത്തുന്ന ഇരുനില ബസ് പുതിയൊരു യാത്രാനുഭവം സമ്മാനിക്കാൻ നിരത്തിലിറങ്ങിയത്. ബസ്സിന്റെ മുകൾ നിലയിലെ മേൽക്കൂര മാറ്റി ഓപ്പൺ റൂഫാക്കിയാണ് നഗരം ചുറ്റുന്നത്. ഉയരത്തിലിരുന്ന് എം.ജി. റോഡും ബൈപാസുമൊക്കെ കാണാം. ഒപ്പം ശംഖുമുഖം തീരത്ത് അല്പനേരം ഉല്ലാസത്തിനായി നിർത്തിയിടുകയും ചെയ്യും. യാത്രയുടെ ആദ്യ പകുതി അവസാനിക്കുന്നത് ബൈപ്പാസിലെ ലുലുമാളിന് മുന്നിലാണ്. യാത്രക്കാർക്ക് ലുലുവിൽ കയറി ഷോപ്പിങ് നടത്താൻ ഒരുമണിക്കൂർ നൽകും. കൃത്യസമയത്ത് തിരികെയെത്തണം.