മാന്നാറിന്റെ വെങ്കലപ്പെരുമ

വെങ്കലം മാന്നാറിന് വെറുമൊരു ലോഹമല്ല. ഒരു നാടിന്റെ കലയും സംസ്കാരവും ജീവനോപാധിയും കൂടിയാണ്. ദേവവിഗ്രഹങ്ങളും വിളക്കുകളും ഓട്ടുമണികളും വെങ്കലത്തിൽ ഉയിർകൊള്ളുന്ന മാന്നാറിലെ ആലകളിലേയ്ക്കാണ് യാത്ര

- REESHMA DAMODAR

നാഗാലാൻഡ് സ്പീക്കറുടെ വസതിയിലെ വലിയ ഓട്ടുമണി, ഡൽഹി പ്രഗതി മൈതാനിലെ ക്രാഫ്റ്റ് മ്യൂസിയത്തിലുള്ള 1,200 കിലോയുടെ വാർപ്പ്, ഷിംലാക്ഷേത്രത്തിലെ 3,500 കിലോയുള്ള ഭീമാകാരൻ ഓട്ടുമണി പലനാടുകളിലാണ് എത്തിപ്പെട്ടതെങ്കിലും ഇവയ്ക്കെല്ലാം ഒരു പ്രത്യേകതയുണ്ട്. എല്ലാം നിർമിക്കപ്പെട്ടത് ഇങ്ങ് കേരളത്തിലാണ്. ആലപ്പുഴ ജില്ലയിലെ മാന്നാർ എന്ന കൊച്ചുഗ്രാമത്തിൽ. വെങ്കലനിർമാണത്തിന്റെ പെരുമ പേറുന്ന ഗ്രാമം.

ചെട്ടികുളങ്ങര ദേവീക്ഷേത്രത്തിലെ കൂറ്റൻ ആൽ വിളക്കിനും ഗുരുവായൂർ ക്ഷേത്രത്തിലെ രണ്ട് ടൺ ഭാരമുള്ള വാർപ്പിനും പറയാനുള്ളത് മാന്നാറിന്റെ കഥ തന്നെ. ഓരോ സൃഷ്ടിയിലും നാടിന്റെ അഭിമാനവും സൂക്ഷ്മതയുടെ സൗന്ദര്യവും നിറയ്ക്കുന്ന കലാകാരന്മാരുടെ കഠിനാധ്വാനത്തിന്റെയും കലോപാസനയുടെയും കഥ.

പമ്പയാറിനോടും അച്ചൻകോവിലാറിനോടും ചേർന്നു കിടക്കുന്ന ഗ്രാമമാണ് മാന്നാർ. തിരുവല്ലയിൽ നിന്ന് മാവേലിക്കരയിലേക്കുള്ള വഴിയെ പോകുമ്പോൾ ഇരുവശങ്ങളിലും വലിയ നിലവിളക്കുകളും ഓട്ടുരുളികളും നിരത്തിവെച്ചിരിക്കുന്ന കടകൾ കാണാം. ഓട്ടുനിർമാണത്തിന്റെ കലയും കരവിരുതും നേരിട്ടുകാണണമെന്ന ആഗ്രഹമായിരുന്നു ഈ യാത്രയുടെ ഇന്ധനം. മാന്നാർ ബെൽ മെറ്റൽ പ്രൊഡ്യൂസേസ്സ് അസോസിയേഷൻ പ്രസിഡന്റ് വെങ്കിടാചലത്തെ തേടിയെത്തുമ്പോൾ അദ്ദേഹം തന്റെ പണിശാലയിലായിരുന്നു. “നിങ്ങൾ വിചാരിക്കുന്നത്ര  എളുപ്പമല്ല. ഒരുപാടുപേരുടെ, ദിവസങ്ങൾ നീളുന്ന അധ്വാനമുണ്ട് ഇതിനുപിന്നിൽ,'' എന്ന് പറഞ്ഞുകൊണ്ട് അദ്ദേഹം ആലയിലേക്ക് ക്ഷണിച്ചു.

പണിയെല്ലാം തീർത്ത ഒരു ഭീമൻ ഓട്ടുമണിയാണ് അവിടെ സ്വാഗതം ചെയ്തത്. ഒരരികിൽ കുറെ വാർപ്പുകൾ നിരത്തിയിട്ടുണ്ട്. മറ്റൊരിടത്ത് വാർപ്പിന്റെ മൺമാതൃകകൾ വെയിലത്ത് ഉണങ്ങാൻ വെച്ചിരിക്കുന്നു. “വെയിൽ കൃത്യമായി കിട്ടണം. എങ്കിലേ, പണി ശരിക്ക് നടക്കൂ,'' വെങ്കിടാചലം പറഞ്ഞു. ആലയിലുള്ളവരെല്ലാം തിരക്കിട്ട ജോലികളിലാണ്. ഇടതടവില്ലാതെ ഓടിക്കൊണ്ടേയിരിക്കുന്നു.പല നിർമാണഘട്ടങ്ങളിലൂടെയാണ് ഓരോ നിലവിളക്കും മണിയും ഉരുളിയും കടന്നു പോവുന്നത്. നിലവിളക്കിന്റെയോ ഉരുളിയുടെയോ ആകൃതിയിലുള്ള കരു (മാതൃക)വുണ്ടാക്കുന്നതു മുതൽ വാർക്കുന്നതുവരെയുള്ള ഘട്ടങ്ങൾ, കരുവിൽ എന്തെങ്കിലുമൊരു പിഴവ് വന്നാൽ, അതുവരെയുള്ള അധ്വാനം മുഴുവൻ പാഴായെന്നർഥം.