താമ്രപർണിയുടെ അതിഥികൾ

കൂന്തൻകുളം. കാതങ്ങൾ താണ്ടി പറന്നെത്തുന്ന പറവക്കൂട്ടങ്ങളെ കണ്ണിന് കണ്ണായി കാത്തുവെക്കുന്ന ഗ്രാമം. തമിഴ്നാട്ടിലെ ഈ പക്ഷിസങ്കേതം മനുഷ്യനും പ്രകൃതിയും തമ്മിലുള്ള ആത്മബന്ധത്തിന്റെ നേർസാക്ഷ്യമാണ്

- Text & Photos: AZEEZ MAHE

വലിയൊരു പക്ഷിക്കൂടായി മാറിയ ഒരുൾനാടൻ തമിഴ് ഗ്രാമം. ഗ്രാമചത്വരത്തിലെ മരമായ മരമൊക്കെയും തൂവൽക്കുപ്പായക്കാരുടെ വർണമേള നത്താൽ പൂത്തുലയുന്നു. തെളിനീർ താടാകത്തിലേക്ക് നക്ഷത്രങ്ങൾ വീണുടയും പോലെ പറന്നിറങ്ങുന്ന നീർപക്ഷികൾ തമിഴ്നാട്ടിലെ കൂന്തൻ കുളം പറവശരണാലയം ദക്ഷിണേന്ത്യയിലെ പ്രധാന പക്ഷിസങ്കേതമാണ്. തിരുനെൽവേലി ജില്ലയിലെ നാങ്കുനേരി താലൂക്കിൽ താമപർണി നദിയുടെ ബാഹുക്കളായ നീർതേങ്കം തടാകസമുച്ചയത്തിലെ ആഴം കുറഞ്ഞ ലവണസമൃദ്ധമായ വെള്ളക്കെട്ടുകൾ ദേശാടനപ്പക്ഷികളുടെ സ്വർഗമാണ്.

ലോകത്തിലെ ഏറ്റവും ദീർഘസഞ്ചാരികളായ ദേശാടനപ്പക്ഷികൾ, സൈബീരിയ, മംഗോളിയ, ഓസ്ട്രേലിയ, ഫിലിപ്പീൻസ്, ജർമ്മനി തുടങ്ങിയ രാജ്യങ്ങളിൽ നിന്ന് കാതങ്ങൾ താണ്ടി കൂന്തൻകുളത്തിന്റെ ഹൃദയതടത്തിലേക്ക് കൂടൊരുക്കത്തിനായി പറന്നെത്തുന്നു. തങ്ങൾക്ക് ഐശ്വര്യമേകാൻ (Harbingers of luck) oilo ന്നെത്തുന്ന പതംഗജാലത്തെ ഈ ഗ്രാമമാകെ ഹൃദയക്കിളിവാതിൽ തുറന്ന് സ്വീകരിക്കുന്നു. നേശവും, പാശവും, അൽപും പാതുകാപ്പുമായി സംരക്ഷിക്കുന്നു. ഓരോ അതിഥികൂട്ടമെത്തുമ്പോഴും മുറിവേറ്റവയെ പരിചരിച്ചും ചിറകറ്റ പക്ഷിക്ക് ചിറകായും ഗ്രാമം അഭയമരുളുന്നു.

ഡിസംബർ-ജനുവരി മാസത്തോടെ കൂടണയാനെത്തി ഓഗസ്റ്റിൽ മടങ്ങുംവരെ പക്ഷികളെ അലോസരപ്പെടുത്തുന്ന ദീപാവലി പടക്കങ്ങളോ ഉച്ചഭാഷിണിയുടെ ശബ്ദഘോഷമോ അന്തരീക്ഷത്തെ ഇവിടെ മലിനമാക്കുന്നില്ല. വെള്ളക്കെട്ടുകൾ ഫാക്ടറി മാലിന്യമോ, രാസവസ്തുക്കളോ കലർന്ന് വിഷമയമാകുന്നില്ല. പറവകൾക്ക് തീറ്റ യൊരുക്കാനായി ഗ്രാമീണർ നദിയിലെ മത്സ്യബന്ധനം പോലും ഒഴിവാക്കുന്നു. മുൻ കാലങ്ങളിൽ ഗ്രാമത്തിലെ മുൾമരങ്ങളിലും വേപ്പുമരങ്ങളിലുമെല്ലാം കൂടുകൂട്ടാനെത്തുന്ന പക്ഷികളെ ഉപദ്രവിച്ചവരെ തലമുണ്ഡനം ചെയ്ത് കഴുതപ്പുറത്തേറ്റി ഗ്രാമപാതകളിലൂടെ എഴുന്നള്ളിച്ച കഥപോലും പഴമക്കാർക്ക് പറയാനുണ്ട്. നിലത്തുവീണ് ക്ഷതമേല്ക്കുന്ന പക്ഷിക്കുഞ്ഞുങ്ങളെ ഗ്രാമത്തിലെ പട്ടികൾ പോലും ഉപദ്രവിക്കാറില്ലത്രേ.