മുത്തങ്ങയുടെ ഹൃദയംതൊട്ട്

മഴയും വെയിലും ഒളിച്ചുകളിക്കുന്ന ഉൾവനത്തിൽ മാനും മയിലും ആനക്കൂട്ടവും ചേർന്നൊരുക്കുന്ന മായക്കാഴ്ചകൾ. ഇതാ, മുത്തങ്ങയിലെ കാടൊരു ഉത്സവവേദിയായി മാറുന്നു

- Text & Photos: AZEEZ MAHE

വർഷങ്ങൾക്കുശേഷമാണ് മുത്തങ്ങ വനഭൂമിയുടെ ഉള്ളകങ്ങളിലേക്ക് പാദമൂന്നുന്നത്. വയനാട്ടിലെ അമ്പലവയൽ ഹൈസ്കൂളിൽ ജോലിചെയ്യുന്ന കാലം തൊട്ട് തുടങ്ങിയതാണ് മുത്തങ്ങയുമായുള്ള ആത്മബന്ധം. കാടകത്തെ പ്രകൃതി പഠനക്യാമ്പുകളിൽ കാടിന്റെ മുക്കും മൂലയും തൊട്ടറിഞ്ഞ് കുട്ടികളോടൊത്തുള്ള ട്രക്കിങ്ങുകൾ.

വനഹൃദയത്തിൽ, മുളംതണ്ടുകളിൽ കെട്ടിയൊതുക്കിയ കുടിലുകളിലെ താമസം. രാവേറെച്ചെല്ലുമ്പോൾ, ഇരുൾപ്പച്ചയിൽ തെളിയുന്ന എണ്ണിയാലൊടുങ്ങാത്ത പുള്ളിമാനുകളുടെ കൂ ട്ട്, നക്ഷത്രങ്ങൾ വീണുടയുമ്പോലെ തിളങ്ങുന്ന അവരുടെ കണ്ണുകൾ. മാനും മയിലും കാട്ടുപോത്തും അപൂർവമായെങ്കിലും കടുവകളും തെളിയുന്ന കാട്ടുകാഴ്ചയുടെ സമ്മോഹനതകൾ. ആ തരളിതഭാവങ്ങളെല്ലാം ഇത്തവണത്തെ യാത്രയിലും കാടകം കാത്തു വെച്ചിരുന്നു.

അർധരാത്രിയോടെ മയ്യഴിയിൽ നിന്നാരംഭിച്ച യാത്ര നിലാവിൽ കുളിച്ചുനിൽക്കുന്ന താമരശ്ശേരി ചുരം താണ്ടി സുൽത്താൻ ബത്തേരി വഴി മുത്തങ്ങയിലെത്തുമ്പോൾ, കാടേറാൻ നേരമായിരുന്നു. കേരളം, കർണാടകം, തമിഴ്നാട് സംസ്ഥാനങ്ങളെ ബന്ധിപ്പിച്ച് ഊട്ടിവരെ നീളുന്ന ദീർഘമായ പശ്ചിമഘട്ട വനപാതയുടെ ഭാഗം. ഉൾക്കാട്ടിലേക്ക് ഈ മൂന്ന് സംസ്ഥാനങ്ങൾക്കും അതിരിടുന്ന മുക്കല്ല് എന്ന കൽനാട്ടി കാണാം. അവിടെ ബന്ദിപ്പൂരും മുതുമലയും മുത്തങ്ങയും സംഗമിക്കുന്നു.