കരവിരുതിന്റെ മൺപാത്രഗ്രാമം

ഓരോ മൺപാത്രത്തിന്റെയും പിറവിക്ക് പിന്നിൽ കുംഭാരൻമാരുടെ ഉറച്ച മനസ്സിന്റെയും കരവിരുതിന്റെയും കഥയുണ്ട്. കാലങ്ങളായി മൺപാത്രനിർമാണവുമായി ബന്ധപ്പെട്ട ജീവിതം നയിക്കുന്നവരാണ് തൃശ്ശൂർ പാത്രമംഗലം, ചെറുതുരുത്തി എന്നിവിടങ്ങളിലുള്ളവർ. കുംഭാരഗ്രാമവിശേഷങ്ങളിലൂടെ...

- Babu

ഇടതുകൈയിലെ മൂന്നുവിരൽ അടിയിലൂന്നി താങ്ങിനിർത്തിയ മൺകലത്തിൽ വലതുകൈയുടെ ചൂണ്ടുവിരൽ മടക്കി പിൻപുറം കൊണ്ടൊന്നു മുട്ടും. ണിം മണിനാദത്തിൽ തുടങ്ങി ഓംകാരത്തിലലിയുന്ന ശബ്ദം പാത്രത്തിന്റെ വാവട്ടത്തിലൂടെ അന്തരീക്ഷത്തിലുയരും. ഈ നിർമിതിയിൽ കളങ്കമില്ലെന്ന്, ഓട്ടപ്പാത്രമല്ലെന്ന് പഞ്ചഭൂതങ്ങൾ സാക്ഷ്യപ്പെടുത്തുകയാണ് ആ നാദത്തിലൂടെ. അതുകേൾക്കുമ്പോൾ അവർ ഓരോരുത്തരുടെയും മനസ്സിൽ സന്തോഷം നിറയും. പൊട്ടാതെ ചുട്ടെടുക്കപ്പെട്ട പാത്രം, ഞാൻ സമ്പൂർണനാണെന്ന് സ്വയം സാക്ഷ്യപ്പെടുത്തുകയാണ്, ആ നാദത്തിലൂടെ.

കുംഭാരക്കോളനികളിൽ ചുട്ടെടുക്കുന്ന ഓരോ പാത്രത്തിനും ജീവനുണ്ട്. അതിലെല്ലാം പഞ്ചഭൂതങ്ങളുണ്ട്. ചൂടേറ്റുറച്ചത് മണ്ണാണ്. മണ്ണിനെ പാത്രരൂപമാക്കിയത് ജലമാണ്. ചൂടേൽപ്പിച്ചുറപ്പിച്ചത് തീയാണ്. പാത്രത്തിന്റെ ഉറപ്പിന്റെ നാദം അന്തരീക്ഷത്തിലലിയിക്കുന്നത് വായുവാണ്. വാവട്ടം ആകാശത്തേക്ക് തുറന്നിരിക്കുന്ന പാത്രങ്ങൾ പഞ്ചഭൂതങ്ങളും ചേർന്ന നിർമിതിയാണ്.

മൺപാത്രങ്ങൾക്ക് സഹസ്രാബ്ദങ്ങളുടെ ചരിത്രമുണ്ട്. കേരളത്തിനുമുണ്ട് ഇതേ പഴമ. ലിപിയില്ലാത്ത ഭാഷയും പ്രയോഗിക്കുന്ന കേരളത്തിലെ കുംഭാരന്മാരുടെ ചരിത്രം വ്യക്തമായി ആരും രേഖപ്പെടുത്തിയിട്ടില്ലെന്നുമാത്രം. പക്ഷേ, എത്രയോ തലമുറ പിന്നിട്ടിട്ടും ലിപിയില്ലാത്ത, തെലുങ്കു സമാനമായ ഭാഷ അവർ കൈമോശം വരുത്തിയിട്ടില്ല ആചാരാനുഷ്ഠാനങ്ങളോട് സന്ധിചെയ്തിട്ടില്ല. തെലുങ്കുദേശം പൂർവികദേശമായി ഇവർ ഇന്നും വിശ്വസിക്കുന്നു.

കാലമെത്ര പുരോഗമിച്ചാലും, ഒരു സോഫ്റ്റ്വെയറിനും ഹാർഡ് വെയറിനും സാധ്യമാകാത്ത നിർമിതിയുണ്ട്. അത് മൺപാത്രനിർമാണമാണ്. കുംഭാരന്മാരുടെ കൈയും മെയ്യുമാണ്  ഹാർഡ്വെയർ. മനസ്സും അനുഭവജ്ഞാനവുമാണ് സോഫ്റ്റ്വെയർ. ഇവകൊണ്ടുമാത്രമേ മൺപാത്രങ്ങൾ രൂപപ്പെടുത്താനാകൂ.

കുംഭാരക്കോളനിയിലെ കാഴ്ചകൾ