மோடி அரசின் சாதனை?

அளவறிந்து செலவு செய்யாவிட்டால் அளவில்லாத துன்பத்திற்கு ஆளாக நேரிடும்.

- பரிதி

அதனால்தான் நம் முன்னோர்கள் கடன் வாங்குவதை தவிர்க்கச் சொன்னார்கள்.

ஆனாலும், இன்றைய நவீன உலகில் நுகர்வு வெறியினால் கை நிறைய சம்பாதித்தாலும், சம்பாதிக்காவிட்டாலும் பை நிறைய ஏதாவது பொருட்கள் இருந்து கொண்டே இருக்க வேண்டும் என்று நினைக்கிறார்கள்.

அப்படி நுகர்வு பொருட்களை நிறைத்துக் கொண்டே இருக்கும் ஒரு இல்லத்தில்... அவையெல்லாம் நேரடியாக பணம் கொடுத்து வருவதில்லை. இ.எம்.ஐ. எனப்படும் மாதத் தவணை முறையில் தான் பெரும்பாலானோர் பொருட்களை கடன் வாங்குகின்றனர். அது ஒவ்வொரு மாதத்திற்கும் நம்மை கடனாளி ஆக்குகிறது. நாம் வாங்கும் சம்பளத்திற்கு, நம் உரிமையை விட பிறர் உரிமை அதிகம் ஆகிவிடுகிறது.

அதை உறுதிப்படுத்தும் வகையில், இந்தியாவில் சம்பாதிக்கும் தனிநபர்கள் மாத சம்பளத்தில் 33 சதவீதத்துக்கும் அதிகமான தொகையை இ.எம்.ஐ-க்காக செலவிடுகிறார்கள் என்ற உண்மையை அண்மையில் வந்த ஆய்வு ஒன்று தெளிவுபடுத்துகிறது.

'இந்தியா எவ்வாறு செலவழிக்கிறது ?' என்ற தலைப்பில் நுகர்வோரின் நடவடிக்கைகளை ஆராய்ந்து இந்த ஆய்வு முடிவு வெளி வந்திருக்கிறது.

சுமார் 54% மக்கள் விவசாயத்தையே சார்ந்துள்ள இந்தியாவில், நிதி ஆயோக்கின் அறிக்கையின்படி, சுமார் 53% விவசாயிகள் வறுமைக் கோட்டுக்குக் கீழே உள்ளனர். 58% விவசாயிகள் பசி, பட்டினியுடன் தூங்க வேண்டிய கட்டாயத்தில் உள்ளனர்.

சுமார் 4.70 கோடி குடும்பங்கள் கடனில் தவிக்கின்றன. 12.60 லட்சம் கோடி ரூபாய் மதிப்புள்ள கடன்களை செலுத்த முடியாமல் விவசாயிகள் தவிக்கின்றனர்.

இந்தியா முழுவதும், மூன்றாம் அடுக்கு நகரங்கள் முதல் பெருநகரப் பகுதிகள் வரை, மாதத்திற்கு ரூ.20,000 முதல் ரூ.1,00,000 வரை வருமானம் ஈட்டும் பல்வேறு மக்கள் தொகைப் பிரிவுகளை சேர்ந்த 30 லட்சத்திற்கும் மேற்பட்ட நுகர்வோரிடம் விரிவாக ஆய்வு நடத்தப்பட்டுள்ளது.

அந்த அறிக்கைப்படி, நுகர்வோரின் மொத்த செலவினங்களில் 39% கட்டாய செலவினங்களுக்குச் செல்கிறது. அதைத் தொடர்ந்து 32% தேவைகளுக்கும் 29% விருப்பப்படியான செலவினங்களுக்கும் செல்கிறது. விருப்பச் செலவினங்களில் 62% ஃபேஷன் மற்றும் தனிப்பட்ட பராமரிப்பு பொருட்களுக்காக செலுத்தப்படுகிறது.