સમસ્યા અનિવાર્ય છે, દુઃખી થવું વૈકલ્પિક છે!

હિતકારી આશાવાદ આશાવાદ એટલે ઉપરવાળો સૌ સારાં વાનાં કરશે એવી અપેક્ષા નહીં, પણ એવો વિશ્વાસ કે આપણે પ્રયાસ કરીશું તો સૌ સારાં વાનાં થશે. આશાવાદી હોવું એટલું સરળ નથી જેટલું આપણે માનીએ છીએ. હકારાત્મક વિચારો હોવા એ આશાવાદ નથી. આશાવાદનો સંબંધ કર્મ સાથે છે.

- રાજ ગોસ્વામી

ભાગ્યનો ભગવાન...

એક ગામમાં પૂર આવ્યું. જીવ બચાવવા માટે એક માણસ ઘરની છત પર ચડી ગયો. પૂરનું પાણી એના ઘરમાં પ્રવેશ્યું એટલે એણે ભગવાનને મદદ માટે પ્રાર્થના કરી. ત્યાં જ નીચેથી એક માણસે વાંસ લાંબો કરીને એ પકડી લેવા કહ્યું. પેલા માણસે કહ્યું કે ભગવાન એની મદદ કરશે.

પાણી એના ઘરના બીજા માળ સુધી આવ્યું એટલે પાણીમાં એક નાવડી આવી. પેલા માણસે વિચાર્યું કે ભગવાન એની મદદ કરશે. પાણી એની છત સુધી આવ્યું ત્યાં એક હેલિકૉપ્ટર આવ્યું અને એના પાઈલટે રસ્સી પકડી લેવા કહ્યું. પેલા માણસે કહ્યું કે ભગવાન એની મદદ કરશે.

અંતે એ પાણીમાં તણાઈ ગયો અને ભગવાનના દરબારમાં હાજર થયો. એણે પૂછ્યું: ‘પ્રભુ, મેં તમારી પર શ્રદ્ધા રાખી હતી. તમે મને કેમ મદદ ન કરી?'

ભગવાને કહ્યું: ‘બેટા, તને વાંસ, નાવડી, હેલિકૉપ્ટર, બધું કોણે મોકલાવ્યું હતું? તને એમ હતું કે હું જાતે આવીને તારો હાથ ઝાલું? ભગવાન એને જ મદદ કરે છે જે ખુદની મદદ કરે છે.’

***