તૈયાર છે ભાવનગરનું સાયન્સ સેન્ટર સમુદ્રની જીવસૃષ્ટિ વચ્ચે લઈ જવા

પાટણ અને ભૂજ પછી હવે ગુજરાતની કલા-સાંસ્કૃતિક નગરીને પણ મળી રહ્યું છે જ્ઞાનપૂર્તિ માટેનું નવું ઠેકાણું.

- જયેશ દવે (ભાવનગર)

ગુજરાતના પ્રવાસે આવતા દેશ-વિદેશના પ્રવાસીઓ માટે અમદાવાદનું સાયન્સ સિટી આકર્ષણનું કેન્દ્ર બન્યું છે. સરકાર અહીં સતત કંઈ ને કંઈ આકર્ષણ ઉમેરતી રહે છે. સાયન્સ અને ટેક્નોલૉજીના પ્રસાર માટેનો આ પ્રકલ્પ ગુજરાતનાં બીજાં શહેરોમાં પણ શરૂ કરવામાં આવ્યો છે અને એના ભાગ રૂપે ભાવનગરમા રિજનલ સાયન્સ સેન્ટર-મ્યુઝિયમ તૈયાર થઈ ગયું છે. ૩૦ સપ્ટેમ્બરે વડા પ્રધાન નરેન્દ્ર મોદી ભાવનગર આવી રહ્યા છે અને એમના હસ્તે આ સેન્ટરનું લોકાર્પણ કરવાનું આયોજન છે.

ગુજરાતમાં રાજકોટ, ભૂજ, પાટણ અને ભાવનગર આ ચાર શહેરોમાં આ પ્રકારનાં રિજનલ સાયન્સ મ્યુઝિયમ ઊભાં કરવામાં આવ્યાં છે અને પ્રત્યેક સેન્ટરમાં અલગ અલગ વિશેષતા રાખવામાં આવી છે. પાટણ ખાતે ગુજરાતના સ્થાપના દિને તો ભૂજ ખાતેના મ્યુઝિયમનું વડા પ્રધાને થોડા દિવસ પહેલાં લોકાર્પણ કર્યું હતું અને ભાવનગર તથા રાજકોટમાં તૈયાર થયેલાં મ્યુઝિયમ આગામી દિવસોમાં ખુલ્લાં મકાવાનાં છે,

ગુજરાત રાજ્યના શિક્ષણ તથા સાયન્સ અને ટેક્નોલૉજી વિભાગના મંત્રી જિતુભાઈ વાઘાણી કહે છે:

‘રાજ્યમાં આ ચાર રિજનલ સાયન્સ સેન્ટર દ્વારા લોકોને વિજ્ઞાનના સિદ્ધાંતો તથા નવી વિકસેલી ક્ષિતિજો અને સંશોધનોથી અવગત કરાવવાનો હેતુ છે. શિક્ષણની સાથે ગીતા સહિતના ગ્રંથના માધ્યમથી આધ્યાત્મિક જ્ઞાન પ્રાપ્ત થાય અને સાયન્સ અને ટેક્નોલૉજીના આવા પ્રકલ્પો દ્વારા આધુનિક જાણકારી મળી રહે એ માટે સરકાર કટિબદ્ધ છે. આ ઉપરાંત, પ્રાકૃતિક ખેતી, ગ્રામ્ય નિર્માણ જેવાં ક્ષેત્રોમાં આધુનિક વિચાર અને વૈજ્ઞાનિક અભિગમના પ્રસારનો પણ આ એક પ્રયાસ છે.’